ڕاوێژكاری مەكتەبی سیاسیی پارتی دیموكراتی كوردستان، (عارف ڕوشدی) ڕایگەیاند، پارتی مكوڕە لەسەر جێبەجێكردنی پەیامی (سەرۆک بارزانی) و چاوەڕوانی لایەنەكانی دیكەیە بۆ ئەوەی پێكەوە دابنیشن و بگەنە ئەنجامێكی ئەرێنی، لەگەڵ ئەوەی هەرشتێك لە بەرژەوەندیی گەلی كورددا بێت، پارتی ئامادەیە بیكات، ئامادەشە کە هەڵبژاردن لە وادەی خۆیدا بکرێت.

(عارف ڕۆشدی)، ڕاوێژكاری مەكتەبی سیاسیی پارتی دیموكراتی كوردستان بە ماڵپەڕی فەرمیی پارتی دیموكراتی كوردستانی گوت: ''پێش ماوەیەك (سەرۆك بارزانی)، سەرۆكی هەرێمی كوردستان، دەستپێشخەرییەكی ڕاگەیاند و هەموو لایەنە سیاسییەكانیش پێشوازییان لێ كرد. دەستپێشخەرییەكە لە بەرژەوەندیی گەلی كورددا بوو، گۆڕانگارییەكانی ئەمڕۆش خێران و ئەوەمان لێ دەخوازن، كە یەكڕیز بین. ئەو دەرفەتەی ئەمڕۆ بۆ گەلی كورد هاتووەتە پێشەوە، دەرفەتێكی مێژوویییە. نابێ هەندێك لایەن ماندووبوونی خەڵكی كوردستان، بەتایبەتی هێزی پێشمەرگە، كە بە هەزاران شەهید و برینداریان داوە، بۆ بەرژەوەندیی حزبی بقۆزنەوە و نێوماڵی كورد تێك بدەن. دەبێ هەموو لایەنەكان دەست لە بەرژەوەندیی حزبی بەربدەن و دەست لەناو دەستی یەكدی بنێن و یەكڕیز بن. چونكە ئەگەر ئەو دەرفەتەی هاتووەتە پێش لەدەستی بدەین، 100 ساڵی دیكەش كورد بەو دەرفەتە ناگاتەوە. هەموو وڵاتانی جیهان تێدەگەن خواستی گەلی كورد سەربەخۆیی و دەوڵەتی كوردستانە، چونکە دەزانن مافێكی ڕەوای گەلی كوردە. بۆیە دەبێت لایەنەكان ئەوە بەهەند وەربگرن و بە جددی كاری لەسەر بكەن، بۆ ئەوەی گەلی كورد بە هیوا و ئاواتەكانی خۆی بگات.''

(عارف ڕوشدی) گوتی: ''پارتی بە هیچ شێوەیەك لە پەیامی (سەرۆك بارزانی) پاشگەز نەبووەتەوە، بەڵكو مكوڕە لەسەر جێبەجێكردنی ئەو پەیامە و چاوەڕوانی لایەنەكانی دیكەیە بۆ ئەوەی پێكەوە دابنیشن و بگەنە ئەنجامێكی ئەرێنی، لەگەڵ ئەوەی هەرشتێك لە بەرژەوەندیی گەلی كورددا بێت، پارتی ئامادەیە بیكات.''

ڕاوێژكاری مەكتەبی سیاسیی پارتی دیموكراتی كوردستان ڕوونیشی كردەوە: ''پارتی و سەرۆكی هەرێمی كوردستان 100% لەگەڵ ئەوەن كە هەڵبژاردن لەكاتی خۆیدا بكرێت.''

kdp-