فەرماندەی پۆلیسی فیدڕاڵی عیراق بەخەندان-ی رایگەیاند، هێزەكانیان توانیویانە پردی كۆن لەسەنتەری شاری موسڵ هەروەها بەڕێوەبەرایەتی پاسپۆرت كۆنتڕۆڵبكەنەوە.

19ی شوباتی ئەمساڵ قۆناغی دووەمی ئۆپەراسیۆنی رزگاركردنی موسڵ دەستیپێكرد، لەماوەی چەند هەفتەی رابردووشدا هێزەكانی پۆلیسی فیدراڵی و یەكەكانی بژاردەی وەزارەتی ناوخۆ بەرەوپێشچوونی بەرچاویان لەخۆرئاوای موسڵ بەدەستهێناوە.

فەریق رائید شاكر جەودەت فەرماندەی پۆلیسی فیدڕاڵی بەخەندان-ی راگەیاند، هێزەكانی پۆلیسی فیدڕاڵی پردی كۆن-یان لەسەنتەری شاری موسڵ كۆنترۆڵكردووەتەوە، لەئێستاشدا بەرەوە گەڕەكی رەئس خۆر پێشڕەوی دەكەن.

ئاماژەی بەوەشكرد، هێزەكانیان لەناوچەی باب جەدید بەڕێوەبەرایەتی پاسپۆرتیان كۆنتڕۆڵكردووە.

هێزە عیراقییەكان حەوتی‌ ئەم مانگە، كۆمەڵگەی‌ حكومی‌ و بینای‌ چەندین فەرمانگەی‌ دیكەیان لەموسڵ كۆنتڕۆڵكردەوە.

یەكشەممەی‌ ڕابردوو هێزەعێراقییەكان كۆنتڕۆڵكردنەوەی‌ سەدای‌ 30ی‌ بەشی‌ ڕۆژئاوای‌ موسڵ-یان ڕاگەیاندو تائێستا لە كۆی‌ 40 گەڕەك 17 گەڕەك لەوبەشەی‌ شارەكە كۆنتڕۆڵكراوەتەوە

لەمانگی رابردوودا و دوای 100 رۆژ لەدەستپێكردنی ئۆپەراسیۆنی موسڵ هێزە عیراقییەكان توانییان بەتەواوی بەشی ڕۆژهەڵاتی موسڵ كۆنتڕۆڵبكەنەوە.







خەندان-