به‌ڕێوه‌به‌رى شاره‌دێى سیده‌كان، ئاشكراى ده‌كات، له‌ سنووره‌كه‌یان نزیكه‌ى 100 گووند به‌هۆى (په‌كه‌كه‌)ـه‌وه‌ ئاوه‌دان نه‌كراونه‌ته‌وه‌ و داواى سه‌رانه‌یان لێده‌كرێت.



ئیحسان چه‌له‌بى، به‌ڕێوه‌به‌رى شاره‌دێى سیده‌كان، به‌ (باسنیوز)ى راگه‌یاند :" له‌ كۆیى 275 گوندى سنووره‌كه‌مان، تائێستا نزیكه‌ى 100 گوند، به‌هۆى بوونى پارتى كرێكارانى كوردستان (pkk)ـه‌وه‌، ئاوادان نه‌كراونه‌ته‌وه‌ و هێڵى سووره‌ بۆ گه‌ڕانه‌وه‌ى دانیشتووانه‌كه‌ى".



گوتیشی :" ته‌نانه‌ت ئێمه‌ وه‌ك حكوومه‌ت ده‌سته‌ڵاتمان له‌ سنوورى ئه‌و گوندانه‌ نییه‌ كه‌ (په‌كه‌كه‌) سه‌رپه‌رشتییان ده‌كات، بۆیه‌ ناتوانین پڕۆژه‌ى خزمه‌تگوزاریان پێبگه‌یه‌نین و ئاوه‌دان بكرێنه‌وه‌".



به‌ڕێوه‌به‌رى شاره‌دێى سیده‌كان، گوتیشى :" به‌داخه‌وه‌ نه‌ك هه‌ر ئه‌وه‌ى رێگه‌ نه‌ده‌ن خه‌ڵكى ئه‌و گوندانه‌ بگه‌ڕێنه‌وه‌ زێدى خۆیان، به‌ڵكو له‌كاتى چوونى خه‌ڵكى ئه‌و گوندانه‌ بۆ هێنانه‌وه‌ى به‌ربوومى گوێز و ڕه‌ز و باخه‌كانییان، سه‌رانه‌یان لێوه‌رده‌گیرێت، هه‌روه‌ها بۆ ڕه‌وه‌ند و كۆچه‌رانیش به‌ هه‌مانشێوه‌ سه‌رانه‌یان لێوه‌رده‌گیرێت".
bas news -