کچە کوردێکی ئێزدی، کە لە چنگی داعش ڕزگار کراوە، ڕایگەیاند، داوای لە کاربەدەستانی ئەڵمانیا کرد، ئەوانیش بۆ ڕزگارکردنی کچان و ژنانی ئێزدی بە هانایانەوە بێن.

ڕۆژی یەکشەممە، بە ئامادەبوونی ژمارەیەکی زۆر بەرپرسانی جیهانی و ئەڵمانی لە نووسینگەی پەرلەمانی شاری بێلێفێلدی ئەڵمانیا باسی کێشەی ڕفێنراوە ئێزدییەکانی دەستی داعش و شنگال کرا.

(ئیخلاس خدر)، کچە ڕزگاربوویەکی دەستی داعش، کە لەو دانیشتنەدا بەشدار بووە، بە ماڵپەڕی فەرمیی پارتی دیموکراتی کوردستانی گوت: ''داوامان لە وڵاتی ئەڵمانیا کرد، ئەوانیش بە هانای ئەو کچ و ژنانەوە بێن، کە ئێزدین و هێشتا لە چنگی داعشدان، تا ئەوانیش هاوکاربن بۆ ئەوەی ڕزگار بکرێن، چونکە لە بندەستی داعشدا ئازارێکی زۆر دەکێشن و ئێستا لە بارێکی زۆر سەختدان.''

(ئیخلاس) گوتی: ''پێمان گوتن، دەبێ بۆ پاڵپشتیی ئێزدییان بێنە سەرهێڵ، بۆ ئەوەی پاڵپشتێکی بەهێز بن، چونکە بەهۆی ئەو ستەمەی کە داعش لێیان کردووین، ئێستا کوردانی ئێزدی لە گشت جیهاندا دەناڵێنن.''
kdp-