نوێنەری تایبەتی دۆناڵت ترامپ، سەرۆکی ئەمەریکا، لە ھاوپەیمانیەتی نێودەوڵەتی دژ بە داعش، لە کۆنگرەیەکی ڕۆژنامەوانیدا ئاماژە بەوە دەدات کە توانیویانە 180 سەرکردەی داعش بکوژن و پێشمەرگەش ڕۆڵێکی باڵای لە تێکشکاندنی داعش ھەبووە.



برێت مەکگۆرک، نوێنەری تایبەتی دۆناڵت ترامپ، سەرۆکی ئەمەریکا، لە ھاوپەیمانیەتی نێودەوڵەتی دژ بە داعش، لە کۆنگرەیەکی ڕۆژنامەوانیدا لە شاری بەغدا، ڕایگەیاند: "نزیکەی 65% خاکی داگیرکراوی دەست داعش ئازاد کراوە، بەھۆیەوەش 2 ملیۆن عێراقی لە دەستی داعش ڕزگار کراوە، ئەوەش بە ھەماھەنگی ھێزەکانی پێشمەرگە و ھێزە عێراقییەکان بووە، کە سەرکەوتووانە کاریان کردووە".


ھەر لەو کۆنگرەیەدا، مەکگۆرک، ئەوەشی خستەڕوو: "پێشمەرگە ڕۆڵێکی باڵای لە تێکشکاندنی داعش ھەبووە، چەندین ناوچەی دەروبەری مووسڵی ڕزگارکرد و ھەروەھا لە بەشێکی ناو مووسڵیش بەشدار بوو، بە ھاوپەیمانی ھەموو لایەک زیاتر لە 180 سەرکردە و کەسایەتی نزیک لە بەغدادی، سەرکردەی داعش کوژراوە، شوێنە گرنگەکانی مووسڵ ئازادکراون، ئێمە بەردەوامیش دەبین لەو شەڕەدا و دوای شەڕیش زیاتر لە 300 ملیۆن دۆلار بۆ ئاوەدانکردنەوەی ئەو شوێنانە دانراوە".



نوێنەری تایبەتی سەرۆکی ئەمەریکا، لە ھاوپەیمانیەتی نێودەوڵەتی دژ بە داعشدا، جەختی لەوەش کردەوە: "زۆر سوپاسی پێشمەرگە دەکەم و ھاوکاری باشیان لەگەڵ ئەمەریکا ھەبووە، شانازیان پێوە دەکەین و پابەندنی بارودۆخی بنەما مرۆییەکان بوونە و یارمەتیدەری ئاوارەکان بوونە و خزمەتێکی باشی خەڵکی مووسڵیان کردووە".
bas news-