كۆسرەت رەسوڵ جێگری یەكەمی سكرتێری گشتی یەكێتی نیشتیمانی كوردستان بەبۆنەی یادی راپەڕینی شاری سلێمانییەوە پەیامێکی بڵاوکردەوەو تێیدا باس لەمێژووی قوربانیدانی شارەکەو داوای خزمەتکردنی زیاتری سلێمانی دەکات.

كۆسرەت رەسوڵ جێگری یەكەمی سكرتێری گشتی یەكێتی نیشتیمانی كوردستان پەیامێكی بەبۆنەی یادی راپەڕینی ساڵی 1991 ی شاری سلێمانی بڵاوكردەوەو رایگەیاند، " 7 ی ئازار یادی بیست و شەشهەمین ساڵڕۆژی ڕاپەڕینە مەزنەکەی شاری سلێمانی دەکەینەوە ئەو شارەی کە هەمیشە لە ڕیزی پێشەوەی قارەمانێتی و قوربانیدان و هەڵمەت بردندابووە بۆسەر دوژمنان و نەیارەکانی گەل و نەتەوەی کورد و هەر لەسەرەتای دروستبوون و دامەزراندنیشیەوە نمونەی شاری داهێنانی نوێ و پڕ ئەمەک و وەفاداری بووە، مێژووی سلێمانیش بۆمان دەگێڕێتەوە کەیەکەمین ئیدارەی حوکومڕانی کوردیش لە سەدەی بیستدا هەر لەم شارەدا و لەسەردەستی شێخ مەحمودی نەمر دامەزرا و ئازایانە ڕووبەڕووی داگیرکەرانی ئینگلیز و جەندرمەی تورکە عوسمانلیەکان ڕاوەستان ."

كۆسرەت رەسول عەلی لەبەشێکی دیکەی پەیامەکەیدا لەباسی شاری سلێمانیدا دەڵێت "زۆربەی هەرەزۆری خەڵکەکەی بیرتیژ و بیر فراوان بوون و کوردستانیانە بیریان کردۆتەوە و دەیان سەرکردە و کەسایەتی دیارو هەزاران لاوی خوێندەوار و خوێن گەرمی بۆ کوردایەتی پێگەیاندووە ، لە سەردەمە جیاجیاکاندا ڕۆڵە و تێکۆشەرەکانی زۆر لە خۆبوردوانە کوانووی خەبات و شۆڕشەکان و کوردایەتیان جۆشداوە لە هەر پارچەیەکی کوردستانی گەورە بووبێت و قوربانیان لەپێناو سەرخستنیان بە شێوەیەکی دیار و بەرچاو بووە. هەر لەبەر ئەو هۆیەش بووە کە دوژمنان و داگیرکەران هیچ کات چاوی خێریان پیا هەڵنەهێناوە و هەمیشە هەوڵی پاشخستنیان داوە و ڕێگری زۆریان بۆ گەشەکردن و ئاوەدانکردنەوەی زیاتریان هێناوەتە ڕێگا."

لەکۆتایی پەیامەکەشیدا كۆسرەت رەسول عەلی جێگری یەكەمی سكرتێری گشتی یەكێتی دەڵێت: "لەم یادە پیرۆزەدا داواکارم لە حکومەتی هەرێمی کوردستان و تێکڕای لایەنە پەیوەندیدارەکان و سەرمایەداری بیانی و خۆماڵیە دڵسۆزەکانیش کە هەرچی زیاترە خزمەت بەم شارە تێکۆشەرەی کوردستان بکەن و دەستی پرۆژەی ستراتیژی و ئاوەدانی زیاتری بگەیەنێ و سیمای شایستەی خۆی پێ ببەخشرێتەوە کە ماوەیەکیشە بەهۆی قەیرانی دارایی هەرێمەوە زۆربەی پرۆژە ی وەبەرهێنان و پرۆژەخزمەتگوزاری یەکانیشی وەکو پێویست نین."

xandan -