مامۆستای زانکۆ، (عەبدولڕەحمان شنگالی) دەڵێ، (پەکەکە) دەیانەوێت پڕۆژەی سەربەخۆییی هەرێمی کوردستان ڕابگرن، بۆیە لە شنگال پشێوی دەنێنەوە و، بوونی (پەکەکە) مەترسییە بۆسەر ئەزموونی هەرێمی کوردستان، بۆیە پێویستە شنگال و هەرێمی کوردستان چۆڵ بکەن.

چاودێرانی سیاسی دەمێکە ئاشکرایان کردووە، (پەکەکە) دەیەوێت کێشە بۆ دامودەزگاکانی حکوومەت و ئەزموونی هەرێمی کوردستان دروست بکات، بۆیە لە شنگال پشێوی دەنێتەوە. مامۆستای زانکۆ (عەبدولڕەحمان شنگالی) دەڵێ، زیاتر لە دوو ساڵە هێزەکانی سەر بە (پەکەکە) لە شنگاڵن و ئێستا هەبوونی ئەم هێزانە لە هەموو جێیەکی کوردستان مەترسییە، چونکە هێزەکانی سەر بە (پەکەکە) لە ناوچەکانی ئامێدی و ئاکرێش هەن و، لە هەمووی ئەو شوێنانە مەترسین لە سەر ئەزموونی هەرێمی کوردستان.

(عەبدولڕەحمان شنگالی) بە ماڵپەڕی فەرمیی پارتی دیموکراتی کوردستانی گوت: ''(پەکەکە) چەندین پەڕۆی جۆراوجۆری لەبری ئاڵای کوردستان هەڵکردووە و ددان بە ئاڵای کوردستاندا نانێت و دەیانەوێ شنگالیش بەسەر چەند ناوچەیەکدا دابەش بکەن و بیکەنە کانتۆن و ناوی جۆراوجۆر، کە ئەمەش خزمەت بە شنگالییەکان ناکات. ئێستا خەڵکی شنگال پێویستیان بە هاوکاریکردنە بۆ ئاوەدانکردنەوەی شنگال، نەک خاکەکەیان دابەش بکرێت.''

ئەو مامۆستای زانکۆیە دەڵێ: ''شنگال پێویستی بە هەرێمی کوردستانە، هەرهێزێک بیەوێت لە شنگال بێت، دەبێ بڕیار لە وەزارەتی پێشمەرگە وەربگرێت و دەبێ هێزەکانی (پەکەکە)ش بگەڕێنەوە بۆ ناوچەکانی خۆیان و شنگال چۆڵ بکەن.''

(عەبدولڕەحمان شنگالی) دەشڵێ: ''(پەکەکە) دەیەوێت کێشە بۆ پێشمەرگە دروست بکات و بووەتە مەترسی لەسەر ناوچەکە. ئەوان، ئەجێندای دەرەکی جێبەجێ دەکەن و دەیانەوێت سەربەخۆییی کوردستان ڕابگرن، بۆیە پشێوی دەنێنەوە''.
kdp-