سەرۆکی ئەنجومەنی شارۆچکەی شنگال، ئاماژە بەوە دەکات کە لە شنگال، ھەموو یاسای و ڕینماییەکانی ھەرێمی کوردستان، جێبەجێ دەکرێت، چونکە شنگال بەشێکە لە ھەرێمی کوردستان، بۆیە ھەندێک ئەجیندای سیاسی سەر بە ڕۆژئاوای کوردستان، قەبوڵ ناکرێت.

وەیسی نایف، سەرۆکی ئەنجومەنی شارۆچکەی شنگال، ڕایگەیاند: "باشترین چارەسەری بۆ شنگالیەکان ئەوەیە کە پەکەکە شنگال چۆڵ بکات، چونکە ھەتا ئێستا شەنگال لەبەر ھێزەکانی پەکەکە ئاوەدان نەکراوەتەوە، خەڵک نەیانتوانیوە بگڕێنەوە سەر ماڵ و حاڵی خۆیان، بەر لە چەند ڕۆژێک بەھۆی ئاڵۆزی پەکەکە، ژمارەیەک خێزان جارێکی دیکە شنگالیان جێھێشتەوە و ئاوارە بوونەوە، بۆیە پێویستە پەکەکە کیشە دروست نەکات و بە ئاشتی و برایەتی، ئەو شارە جێبھێڵیت".

سەرۆکی ئەنجومەنی شارۆچکەی شنگال، ئەوەشی ئاشکرا کرد: "پڕۆژەی بە پارێزگابوونی شنگاڵ، لەسەر داخوازی خەڵکی شنگال دانراوە لەبەردەستی بارزانییە، ھەر کاتێک بڕیار بدا، جێبەجێ دەکرێت و شنگال دەبێتە پارێزگا".

ئاشکراشی کرد: "بەرژەوەندی ھەندێک کەس، کارەسات لە شنگال دروست دەکات، پێویستە ئەو کەسانە بە یاسا و دەستووری شنگال کار بکەن، دەست لە ھەندێک بیر و بۆچونی خۆیان بەردەن".












باسنیوز