چاودێرێكی سیاسی پێی وایە بوونی پەیوەندی نێوان هەولێر و بەغدا پڕۆسەیەكی گرنگە بۆ گەیشتن بە چارەسەر لە ڕێگەی دیالۆگێکی ئاشتیانەوە؛ هەروەها ڕاشیدەگەیێنێ، ئەگەر بمانەوێت جیا ببینەوە لە عێراق با سەرەتا ڕێگەی ئاشتیانە بگرینە بەر و هیچ نەبێت وەك دوو دەوڵەتی دراوسێ لە دڵی ڕۆژهەڵاتی ناوەڕاستدا بەرژەوەندی هاوبەشمان هەیە.

دكتۆر (عومەر نوورەدینی) چاودێری سیاسی ڕایگەیاند: "بوونی پەیوەندی هەرێم لەگەڵ بەغدا لە چوارچێوەی دەوڵەتێكی فیدراڵدا بێت یان چوارچێوەی دوو دەوڵەتی سەبەخۆی دراوسێدا گرنگە، چونكە ئێمە لە ناوچەیەكداین لە دڵی ڕۆژهەڵاتی ناوەڕاستدا بەرژەوەندی هاوبەشمان هەیە و تەحەدیاتی هاوبەشیشمان هەیە، بۆ نموونە لە ڕووی تیرۆر و ئەمنیەوە پێویستمان بەوە هەیە هەماهەنگی و هاوكاریی یەكتر بكەین، لەبەر ئەوەی دوژمنێكی هاوبەشە، هەروەها پێویستە بۆ سەربەخۆیی و ڕاگەیاندنی قەوارەیەكی سەبەخۆ لەگەل ناوەند دانوستان بكرێت و لەڕێگەی دانوستانەوە بێت.

ئەو چاوێرە سیاسیە دەڵێ" ئێستا هەندێ ئاماژە دەبینین سەرۆك وەزیرانی عێراق ڕایدەگەیەنێ دژی مافی چارەنوسی خەڵكی هەرێمی كوردستان نیە، دەیەوێ دانوستان لەگەل هەرێمی كوردستان بكات و بگاتە ڕێكەوتن، ئامادەیی نیشانداوە لەبارەی مەلەفی نەوتیشەوە گفتوگۆ لەگەل هەرێمی كوردستان بكات پێم وایە دانوستان باشە لە نێوانی هەولێر و بەغدا بكرێت، چونكە بەڵایەنی كەمەوە ئەگەر دەستكەوتیش بەدەستەوە نەهێنین لە ئەنجامی دانوستانەكان ئەوە زیانی نابێت.

دكتۆر عومەر نوورەدینی گوتیشی: "بەكارهێنانی میكانیزمی ئاشتیانە و دیالۆگ بۆ چارەسەركردنی كێشەكان دەبێت ئامرازێك بێت هەمیشە لە دەستماندا بێت و بەكاری بهێنین و سوودی لێوەربگرین، لەهەر كات و شوێنێك پێویستی كرد میكانیزمی ئاشتیانە بگرینە بەر مێژووی نێوان قەوارە سیاسی و دەوڵەتەكان ئەوەیان سەلماندووە كە میكانیزمێكە ئەنجامی باش دەدات بەدەستەوە، ڕەنگە بڵێین بەغدا زوو پێشوازی لە داواكاری كورد بۆ ڕیفڕاندۆم و سەربەخۆیی وەڵامی دەبێت، لەوانەیە لەكاتێكی زوودا ئەوە ڕوونەدات، بەڵام كاریگەری زۆری دەبێت لەسەر ئەوەی بە ئەنجام و پێشنیاری تازە بگەین، هەوڵ بدرێت پەیوەندیەكان لەسەر بنەمای ئەوەی پێدەڵێن سەردەمی نەرم و كێشە بە گفتوگۆ چارە دەكرێ نەك بە هێز و توندوتیژی."










KDP