وەزیری ناوخۆی هەرێم رایگەیاند، داوایان لە حكومەت كردووە وەرگرتنی سزای سەرپێچی كامێراكانی هاتووچۆ بكرێتە قیستی مانگانە و حکومەتیش ڕەزامەندیی نیشانداوە.

کەریم سنجاری وەزیری ناوخۆی هەرێم بە ڕۆژنامەی هەولێری ڕاگەیاندووە، بە لەبەرچاوگرتنی بارودۆخ و ژیانی هاوڵاتیان و ئەو قەیرانە داراییەی ڕوبەڕوی خەڵك بووەتەوە، بەفەرمی داوایان لە حكومەت كردووە، بڕی سزای سەرپێچی كامێراكانی هاتووچۆ بكرێتە قیستی مانگانە.

ڕاشیگەیاندووە، ئەو كێشەیە تەنیا بەو میكانیزمە دەتوانرێت چارەسەربكرێت و هاوڵاتیان سەرپێچییەكانی هاتوچۆ بەشێوەی قیستی مانگانە بدەن.

ئاماژەی بەوەشکردووە، ئەو بڕیارە لە كۆبوونەوەی ڕۆژی پێنجەشممەی ڕابردوی ئەنجومەنی وەزیراندا گەیشتووەتە قۆناغی كۆتایی و بەمزوانە دەخرێتە بواری جێبەجێكردنەوە .

وەزیری ناوخۆی هەرێم ڕاشیگەیاندووە، بڕیارەکە بەپێی ڕێنمایییەكی نوێ پەیڕەودەكرێت و بەپێی زۆری سەرپێچییەكە دەبێت و دابەشی چەند مانگێك دەكرێت.