کچە چالاکوانێکی کورد بەناوی مەنیژە فاتحی خەڵکی ساری بۆکان ماوەی شەش مانگە لەلایەن ئیتلاعاتی بۆکانەوە دەستبەسەر کراوە، بەڵام چارەنووسی هێشتا ناڕوونە.

بەپێی هەواڵی ماڵپەڕی کوردستان و کورد، مەنیژە فاتحی لە مانگی شوباتەوە لەلایەن هێزەکانی ئیتلاعات لە ماڵی خۆیان لە شاری بۆکان، دەستگیر کراوە، ئێستا دوای تێپەڕینی شەش مانگ، هێشتا چارەنووسی ناڕوونە و کەس بە هەواڵی نازانێت.

کەسێکی نزیک لە مەنیژە دەڵێ بنەماڵەکەی لەو شەش مانگەدا بەردەوام سەردانی ئیدراەی ئیتلاعاتی بۆکان و ورمێیان کردوە، بەڵام هیچ زانیارییەکی ڕاستیان لێ وەرنەگرتوون و ئەوەش وای کردووە نیگەرانییەکانیان سەبارەت بە چارەنووسی ناڕوونی کچەکەیان چەند قات زیاتر بێت.

هەتا ئیستا هۆکاری گیرانی ئەو کچە و ئەو تۆمەتانەی دەراونەتە پاڵی ڕوون نەبوونەتەوە.

لە سەرەتای ئەمساڵەوە هەتا ئێستا زیاتر لە 60 چالاکوانی کورد لە شارەکانی کوردستانی لەلایەن ئیدارەی ئیتلاعاتەوە گیراون و بەپێی ئاماری ماڵپەڕە خۆجێیەکانی کوردستانی ڕۆژهەڵات، هێزە ئەمنییەکان بۆ دەستبەسەرکردنی هیچکام لەو کەسانە حوکمی دادگایان پێ نەبووە و تا ئێستاش سەرەڕۆیانە لە زیندانەکانی ئیتلاعاتدا بەند کراون.











باسنيوز