هاووڵاتییانی کوردی شەبەک داوا دەکەن ناوچەکانیان بخرێتەوە سەر هەرێمی کوردستان و ستایشی رۆڵی پێشمەرگە دەکەن.



لە کۆنگرەیەکی رۆژنامەوانیدا، کە رۆژی پێنجشەممە 25ـی ئابی 2016 ژمارەیەک کەسایەتیی و هاووڵاتیی کوردی شەبەک لە شاری بەردەڕەش ئەنجامیان دا، ستایشی رۆڵی پێشمەرگەیان کرد، کە ”چەندین داستانی بۆ رزگار کردنی شەبەکەکان تۆمار کردووە“.



ئەو کەسایەتییە کوردە شەبەکانە دڵنیایی خۆیان لە رزگار کردنەوەیان ناوچەکانیان و دەرپەڕاندنی رێکخراوی توندڕەوی داعش نیشان دا و رایانگەیاند، کە ئەوان دەیانەوێ دوای رزگار کردنەوەی، دەشتی نەینەوا بکرێتە پارێزگایەکی سەربەخۆ و بخرێتە سەر نەخشەی هەرێمی کوردستان.



هەروەها کوردە شەبەکەکان داوایان کرد، کە دوای رزگار کردنەوەی تەواوەتیی ناوچەکانیان، دەست بە ئاوەدانکردنەوەیان بکرێت و رۆڵەکانی شەبەکیش لە ریزی هێزەکانی پێشمەرگە وەربگیرێن، تاوەکو لەژێر سایەی ئاڵای کوردستان، بەرگریی لە ناوچەکانیان بکەن.



چەکدارانی داعش لە مانگی حوزەیرانی 2014، دوای هەرەس پێهێنانی سوپا و هێزە ئەمنییەکانی عێراق، شاری مووسڵ و زۆربەی ناوچەکانی پارێزگاکانی نەینەوا، دیالە، سەڵاحەدین و ئەنباریان داگیر کرد.



باسنیوز