ئەمڕۆ سێشەممە، وەزیری پەروەردەی حکوومەتی هەرێمی كوردستان، سەدرانی هۆڵی تاقیكردنەوەكانی كرد، دواتر لە کۆنگرەیەکی ڕۆژنامەنووسیدا باسی لە گۆڕانکاریی قوتابخاەنکانی عیشق کرد.

ئەمڕۆ سێشەممە، 23/8/2016، د. پشتیوان سادق، وەزیری پەروەردەی حکوومەتی هەرێمی كوردستان، لە كۆنگرەیەكی ڕۆژنامەنووسیدا، ڕایگەیاند: "لە خولی یەكەم 260,000 قوتابی بەشداریی تاقیكردنەوەكانی بەكالۆریان كردبوو، ڕێژەی دەرچوون 25% بوو، پاش تاقیكردنەوەكانی خولی دووەم، لەوانەیە ڕێژەكە بگاتە سەرووی 50%، چونكە قوتابی هەیە خۆی دەهڵێتەوە، تا نمرەی باش بهێنێت، ئەم ڕێژەیەش زۆر ئاساییە، بۆیە ڕێژەی بەشداری تاقیكردنەوەكان سەدا سەد، بەدیار ناكەوێت، تا دوای تاقیكردنەوەكان".

وەزیری پەروەردە، ئەوەش ڕوون دەكاتەوە: " ساڵانە 17 ملیۆن كتێب بە 1100 ناونیشانی جیا چاپ دەكەین، ئەمساڵیش مامۆستایان و قوتابیان دڵنیا دەكەینەوە كە وەك ساڵی ڕابردوو پەرتووكی خۆیان وەردەگرن".

لەبارەی قوتابخانەكانی عیشقەوە، د. پشتیوان سادق، گوتیشی: " هەموو قوتابیانی قوتابخانەکانی عیشق دڵنیا دەكەینەوە كە ئەوان بەردەوام دەبن لە قوتابخانە و خوێندنی خۆیان، ڕاستە لە ڕووی كارگێڕی و خاوەنداریەتییەوە گۆڕانی بەسەردا دێت، بەڵام بە هیچ جۆرێك كار لەسەر نمرە، خوێندن و پرۆگرامەكان ناكات، قوتابیان لە شوێنی خۆیان دادەنیشن و خوێندنی خۆیان دەكەن و لە پرۆسەی خوێندنیان بەردەوام دەبن".









باسنيوز