تۆری ڕێکخراوەکانی ژینگە پارێزی هەولێر ئاماژەبەوەدەکەن، بەشیک لە نەمامەکانی شارەکە وشک بوون، کە ئەوەش زەنگێکی مەترسیدارە بۆ کەمبوونەوەی ڕێژەی سەوزایی لە شاری هەولێر، بۆ ئەو مەبەستەش، لەبەرامبەر کەمی خزمەتکردنی پارک و شوێنە گەشتیارییەکانی هەولێر ئەو رێکخراوانە یاداشتێکی ناڕەزایەتییان دایە بەرێوەبەرایەتی ئەندازەی پارکەکانی هەولێر.

لە ئێستادا ئاماژەبەوەدەکرێـت، قەیرانی دارایی و نەکردنیان بە فەرمانبەری حکومەت ئەو گرفتانەن کە وایکردووە کرێکارەکان وەک پێویست خزمەت بە پارکەکان نەکەن.

کارمەندێکی پارکی شانەدەریش دەڵێت چوار ساڵە بەشێوەی گرێبەست کار دەکات و چەند جارێک داوایکردووە بکرێت بە فەرمانبەری ڕەسمی حکومەت و کەس وەڵامی داواکارییەکەیان نەداوەتەوە .

بەرپرسانی ئەندازەی پارکەکان لە هەولێر ڕەتیدەکەنەوە هۆکاری وشکبوونی نەمامەکان کەمی خزمەت گوزاری بێت هۆکارەکەی بۆ گۆڕانی وەرزی دەگەڕێننەوە.

سەرباری هەبوونی ١٥ پارکی ٣٠٠٠ مەتر دووجایی و زیاتر لە ٣٥٠ باخچە، تا ئێستا ڕێژەی سەوزایی لە شاری هەولێر نەگەشتووتە ئاستی ستانداردی جیهانی.