مامۆستایەکی زانکۆ دەڵێت، ئەمڕۆ داوای لە بارزانی کردوە، لە سلێمانی و لەماڵی مام جەلال لەگەڵ نەوشیروان مستەفادا کۆببێتەوە، لە وەڵامیشدا بارزانی وتوویەتی، ئایا گرنتی ئەوە هەیە لە سلێمانی پێشوازی لێدەکرێت و لایەنەکان وەڵامی دەدەنەوە.

نادر نانەکەلی مامۆستای زانکۆ و یەکێک لەو مامۆستایانەی ئەمڕۆ ٢١ ی ئابی ٢٠١٦ سەردانی بارزانی کرد لە سەڵاحەدین، بە ئێن ئاڕ تی ڕاگەیاند "من وەک هاوڵاتییەک داوام لە بارزانی کرد، کە مام جەلال گەڕایەوە بۆ سلێمانی سەردانی سلێمانی بکات و لەگەڵ نەوشیروان مستەفا و سەرکردەکانی دیکەدا کۆببێتەوە".

ئەو مامۆستایەی زانکۆ دەشڵێت "بارزانی ئەو بابەتەی بەلاوە قورس بووە و وتوویەتی، ئایا گرنتی ئەوە هەیە من سەردانی سلێمانی بکەم پێشوازیم لێدەکرێت و لایەنەکان وەڵامیان دەبێت بۆ ئەوەی کۆببینەوە".

لە ٢٨ ی مانگی نیسانی ساڵی ٢٠١٥ دا، بارزانی سەردانی سلێمانی کرد و چاوی بە تاڵەبانی کەوت، بەڵام لەگەڵ نەوشیروان مستەفادا کۆنەبووەوە و دواتریش سەردانی ئەمریکای کرد.

ماوەی زیاتر لە ساڵێکە بەهۆی کۆتایی هاتنی ماوەی ویلایەتی سەرۆکایەتی هەرێمەوە، کێشە لەنێوان لایەنە سیاسیەکانی هەرێمدا دروستبووە و دوای ئەنجامدانی چەندین کۆبوونەوەی جیاوازیش کێشەکانی نێوان لایەنە سیاسییەکانی هەرێم چارەسەر نەکراون.