کۆبوونەوەی ئەنجومەنی پارێزگای سلێمانی بۆ گۆڕینی پارێزگار، دوا دەخرێت.

بڕیار بوو ئەمڕۆ یەکشەممە 21ـی ئابی 2016، ئەنجومەنی پارێزگای سلێمانی بۆ ئاڵوگۆڕی پارێزگار و سەرۆکی ئەنجومەنی پارێزگا، کۆ ببێتەوە.



سەرچاوەیەک لە ئەنجومەنی پارێزگای سلێمانی ڕاگەیاند "کێشە لە نێوان ئەندامانی یەکێتی و گۆڕان لە ئەنجومەن دروست بووە، گۆڕان دەیهەوێ کۆبوونەوەکە بەڕێوە بچێت، بەڵام ئەندامانی یەکێتی پێداگری لەسەر دواخستنی کۆبوونەوەکە دەکەن.



کۆبوونەوەکە تایبەت بوو بە گۆڕینی ئاسۆ فەرەیدوون، پارێزگاری ئێستای سلێمانی و پێدانی پۆستەکەی بە هەڤاڵ ئەبووبەکر، سەرۆکی ئەنجومەنی پارێزگا.



دوای هەڵبژاردنی رابردووی ئەنجومەنی پارێزگاکان، یەکێتیی نیشتیمانیی کوردستان و بزووتنەوەی گۆڕان رێککەوتن پۆستی پارێزگاری سلێمانی دوو ساڵ بە دوو ساڵ بەڕێوە ببەن و دوو ساڵی یەکەم بۆ ئاسۆ فەریدوون، نوێنەری یەکێتی بێت.








باسنیوز