فڕۆکە جەنگییەکانی رژێمی سووریا شاری حەسەکە لە کوردستانی رۆژئاوا بۆردومان دەکەن.



بەھۆی بۆردومانەکانەوە ھاووڵاتییانی دانیشتووی حەسەکە سەنتەری شارەکە چۆڵ دەکەن و بەرەو گوند و ناوچەکانی دەوروبەری شارەکە ڕادەکەن.



بەپێی زانیارییەکان، بۆردومانی فڕۆکە جەنگییەکانی ڕژێمی سوریا بۆ سەر ناوچەکانی ژێر دەسەڵاتی یەپەگە لە گەڕەکەکانی موفتی، خەشمان و عەزیزییە لە حەسەکە ماوەی سێ رۆژە بەردەوامە.



دانیشتووانی شاری حەسەکە پەنایان بردووەتە ناوچەکانی دەوروبەری شارەکە و بەشێکی زۆریان چوونەتە گوندەکانی توپو، شێخنی و خربی کەژێ، کە دەکەونە باکووری شاری حەسەکە.



شار حەسەکە لە کوردستانی رۆژئاوا، لەژێر دەسەڵاتی پارتی یەکێتی دیموکراتی (پەیەدە)یە، کە باڵی پارتی کرێکارانی کوردستان (پەکەکە)یە لە کوردستانی رۆژئاوا و دەکەوێتە سنووری کانتۆنی جزیرێ.