محه‌مه‌د سه‌یهوود، په‌رله‌مانتاری فراكسیۆنی ده‌وڵه‌تی یاسا له‌ په‌رله‌مانی عێراق رایگه‌یاند، نه‌كشانه‌وه‌ی هێزه‌كانی پێشمه‌رگه‌ له‌ ناوچه‌ ئازادكراوه‌كان، داگیركردنه‌ نه‌ك ئازادكردن و هاوكات راشیگه‌یاند، پێشمه‌رگه‌ و داعش وه‌كو یه‌كن له‌ به‌رده‌م گوللـه‌ی هێزه‌ ئه‌منییه‌كان و حه‌شدی شه‌عبیدا ئه‌گه‌ر نه‌كشێنه‌وه‌.

محه‌مه‌د سه‌یهوود، بۆ وێبسایتی "موازین نیوز" ده‌ڵێت: "سه‌رۆكی هه‌رێمی كوردستان به‌ لێدوانه‌كانی كورد رووبه‌ڕووی عه‌ره‌ب ده‌كاته‌وه‌".

هه‌روه‌ها گوتی: "ئه‌و ناوچانه‌ی هێزه‌كانی پێشمه‌رگه‌ ئازادییان ده‌كه‌ن و تێیاندا ناكشێنه‌وه‌، ئه‌وا داگیركردنه‌ نه‌ك ئازادكردن".

گوتیشی: "سووربوونی پێشمه‌رگه‌ له‌سه‌ر نه‌كشانه‌وه‌یان و داگیركردنی ئه‌و ناوچانه‌، ئه‌وا له‌لایه‌ن هێزه‌ ئه‌منییه‌كان و حه‌شدی شه‌عبی وه‌كو داعشییان لێی ده‌ڕوانرێت".

فه‌رمانده‌ مه‌یدانییه‌كانی هێزی پێشمه‌رگه‌ی كوردستان، دوای ئۆپه‌راسیۆنه‌ دوو رۆژییه‌كه‌ی 14ی مانگ و ئازادكردنی 12 گوندی ده‌شتی نه‌ینه‌وا، رایانگه‌یاندووه‌، ئه‌و ناوچانه‌ی پێشمه‌رگه‌ به‌ خوێن ئازادییان ده‌كات، تێیاندا ناكشێته‌وه‌.