گوتەبێژی بزووتنەوەی ئیسلامیی كوردستان، رەخنە لە سیاسەتی پەیەدە دەگرێت بەوەی نەیتوانیوە بڕیاری سیاسی لە دەست خۆی بێت و، مەترسیی بەردەوامبوونی سیاسەتی پەیەدەیش دەخاتە ڕوو.

(د. عەبدوڵڵا وەرتی)، رایگەیاند: "هەر كەس و لایەنێك سوكایەتی بە ئاڵای كوردستان بكات، سوكایەتیكردنە بە هەست و نەستی خەڵكی هەر چوار پارچەی كوردستان، ئەگەر كورد بن ئەوە بێڕێزی بە خودی خۆیشیان دەكەن و شكاندنی ڕێز و حورمەتی گەلەكەی خۆیانە".

(وەرتی) گوتیشی: " پەیەدە پێویستی بەوەیە كە ئاشتەوایی نیشتیمانی لە ڕۆژئاوای كوردستان بەرقەرار بكات و دەست نەبەن بۆ هیچ هێز و لایەنێكی سیاسی كوردستان، بەڵكو بەیەكەوە خەبات بكەن لە پێناوی گەییشتن بە مافە رەواكانی گەلی كوردستان، بۆیە سیاسەتی دەركردن و پەراوێزخستن و گرتنی سەركردەكان خزمەتی ڕۆژئاوای كوردستان و ئاشتەوایی نیشتیمانی ناكات".

(د. عەبدوڵڵا وەرتی) دەشڵێ: "دەبێت پەیەدە پێداچوونەوەیەك بە خۆیدا بكاتەوە لە چۆنیەتیی مامەڵەكردن و هەڵسوكەوتكردن لەگەڵ هێزەكانی ڕۆژئاوای كوردستاندا، چونكە ئەوانیش خەبات بۆ ڕزگاریی نیشتیمانیی كوردستان دەكەن، بۆیە بە راستی پێمان وایە ئەو نەفەسە تەسكەی لە ڕۆژئاوای كوردستان مامەڵەی پێ لەگەڵ هەندێك هێز و لایەنی سیاسیدا دەكرێت، كارێكی خراپە".

گوتەبێژی بزووتنەوەی ئیسلامی ده‌شڵێت، دەبێت پەیەدە سەربەخۆیی خۆی بپارێزێت، بڕیار لەدەستی خۆیدا بێت و گرێدراوی هیچ هێز و لایەنێكی سیاسی نەبێت، تایبەتمەندیی ڕۆژئاوای كوردستانیش لە بەرچاو بگرێت هەم لەگەڵ سووریا و هەم لەگەڵ وڵاتانی دراوسێ و جیهان، چونكە ئەو جۆرە سیاسەتە لە ڕۆژئاوا خزمەت بە كەس ناكات.










KDP