دوای تێپەڕبوونی زیاتر لە ٣مانگ بەسەر ڕێكەوتنی نێوان كورد و حەشدی شەعبی لەشارۆچكەی دووز خورماتوو بەڵام تائێستا خاڵەكانی ڕێكەوتنەكە نەخراونەتە بورای جێبەجێكردنەوە.

بردنە دەرەوەى هێزەکانى هەردوولا لە شارۆچکەکەدا و سپاردنى پاراستنى ئاسایشى قەزاکە بە هێزەکانى پۆلیس و پێکهێنانى لیژنەیەک بۆ چاودێریکردنى جێبەجێکردنى ڕێککەوتنەکە، دیارتین خاڵەکانى ڕێککەوتنى نێوان پێشمەرگە و حەشدى شەعبى بوون.

قایمقامی شارۆچكەكەش دەڵێت جێبەجێکردنى چەند خاڵێکى ڕێكەوتنەكە پێویستیان بەبڕیاری سیاسیە.

بەوتەى بەرپرسانى حزبى شارۆچکەکە هەرچەندە ئێستا دۆخی ئەمنی دوزخورماتوو ئارامە، بەڵام جێبەجێنەكردنی ڕێكەوتنەكە مەترسی دووبارە سەڕهەڵدانەوەی گرژی و ئاڵۆزیەكانی لێدەکرێت بەتایبەت کە حەشدی شەعبی یەكێك لەگرنگترین خاڵەكانی ڕێککەوتنەکەى جێبەجێ نەكردوە، كە بردنە دەرەوەی هێزەكانیانە لەناوەندی شارۆچكەكەدا.

لەسەرجەم كۆبونەوەكانی نێوان بەرپرسانی كورد و حەشدی شەعبیدا جەخت لەوە کراوەتەوە كە پێویستە بەزووترین کات خاڵەكانی ڕێكەوتنەكە جێبەجێبكرێن، بەڵام بەرپرسانی حەشدی شەعبی دەڵێن جێبەجێکردنى هەر رێکكەوتنێك پێویستی بەكات هەیە .

لە یەکەم شەڕى نێوان پێشمەرگە و حەشدى شەعبیدا نۆ پێشمەرگە و هاوڵاتى کورد شەهیدبوون و ٢٠ کەسیش برینداربوون، لە دووەم شەڕیشدا حەوت پێشمەرگە و هاوڵاتى شەهیدبوون و نزیکەى ٣٠ کەسى دیکەش برینداربوون.

لە هەردوو شەڕەکەشدا نزیکەى ٧٠ چەکدارى حەشدى شەعبى کوژران و زیاتر لە ١٥٠ چەکدارى دیکەشیان برینداربووە.