لە بەرامبەر تۆپبارانكردنی گوندەكانی شارەدێی سیدەكان لەلایەن كۆماری ئیسلامیی ئێرانەوە، دەستەی سەربەخۆی مافی مرۆڤ لە بەیاننامەیەكدا داوا لە ئێران دەكات ڕێز لە سەروەریی خاكی هەرێمی كوردستان بگرێت ‌و كۆتایی بە تۆپبارانكردنی ئەو ناوچانە بهێنێت.

لە بەیاننامەكەی دەستەی سەربەخۆی مافی مرۆڤ كە ئەمڕۆ 12/8/2016 بڵاو كراوەتەوە "بەداخەوە جارێكیتر ناوچە سنورییەكانی هەرێمی كوردستان لە دەڤەری سیدەكان ‌و دەوروبەری لەلایەن كۆماری ئیسلامیی ئێرانەوە تۆپباران كرایەوە و بووە مایەی دەربەدەریی دەیان ماڵ‌ و خێزان‌ و سووتانی سەدان دۆنم باخ ‌و ژینگەی سروشتی ناوچەكە".

لە بەیاننامەكەدا ئەوە ڕوون كراوەتەوە كە "هیچكات زمانی شەڕ و چەك نەبووەتە مایەی ئارامی ‌و یەكلاكردنەوەی كێشە و ناكۆكییەكان جگە لە ماڵوێرانی ‌و قووڵتربونەوەی كێشەكان، و ناكرێت هەرێمی كوردستان ‌و خەڵكەكەی ببنە قوربانیی ناكۆكی ‌و كێشەكانی نێوان كۆماری ئیسلامی‌و حزب‌ و لایەنەكانی ئەو وڵاتە و پێویستە هەموان رێز لە خاكی هەرێمی كوردستان بگرن".

دەستەی سەربەخۆی مافی مرۆڤ داوا لە كۆماری ئیسلامی ئێران دەكات "ڕێز لە سەروەریی خاكی هەرێمی كوردستان ‌و رێككەوتنە نێودەوڵەتییەكانی سنوور بگرن ‌و كۆتایی بە تۆپبارانكردنی ئەو ناوچانە بهێنن كە شوێنی ژیان‌ و نیشتەجێبونی هاووڵاتیانە، چونكە بەپێی رێككەوتن ‌و یاساكانی جەنگ نابێت هاووڵاتیانی مەدەنی ‌و شوێنی دانیشتوان ببێتە مەیدانی جەنگ‌ و هەڕەشە و سەربازی ‌و تۆپباران ‌و لەناوبردنی سروشت‌ و ژینگە".






باسنیوز