وەزارەتی پەروەردە راگەیێندراوێکی لەبارەی گواستنەوەی مامۆستایان لە سنووری پەروەردەی هەولێر بڵاوکردووەتەوە و چەند رێنماییەک بۆ ئەو مامۆستایانە دەردەکات کە دەیانەوێت لە سنووری پەروەردەکانی خۆیان نەمێنن و بیگوازنەوە بۆ ئەو شوێنەی خۆیان دەیانەوێت.

رۆژی چوارشەممە 10-8-2016 وەزارەتی پەروەردە نووسراوێکی فەرمی بۆ بەڕێوەبەرایەتی پەروەردەکانی "(ناوەندی هەولێر، دەوروبەری هەولێر، دەشتی هەولێر، خەبات، شەقڵاوە، مەخموور، کۆیە ، سۆران، رواندز، چۆمان و مێرگەسۆر) ناردووە و لەگەڵ نووسراوەکەدا ئاماژە بە چەند رێننماییەک کراوە.

رێننماییەکانی گواستنەوەی مامۆستایان لە سنووری پەروەردەکانی هەولێر.

یەکەم: مامۆستا مافی گواستنەوەی هەیە لە پەروەردەیەکەوە بۆ پەروەردەیەکی دیکە دوای تەواوکردنی ماوەی خزمەتی لە بازنەی خۆی ، بەمەرجێک بەڕێوەبەری قوتابخانە و سەرپەرشتیار رەزامەند بن.

دووەم: مۆڵەتی دایکایەتی و بێ مووچەی تەنسیب بۆ مەبەستی گواستنەوەی هەژمار ناکرێت، بەڵکو دەبێت لەهەر بازنەیەک خزمەتی فعلی کردبێت.

سێیەم: مۆڵەتی خوێندن بۆ مەبەستی گواستنەوە هەژمار ناکرێت، واتە دوای تەواوبوونی مۆڵەتی خوێندن دەبێت بگەڕێتەوە شوێنی پێویستی خۆی، تاوەکو خزمەتی فعلی لە دەرەوەی شار تەواو دەبێت.

چوارەم: گواستنەوە بەهیچ شێوەیەک مامۆستای گرێبەست ناگرێتەوە.

پێنجەم: ئەگەر پەروەردەی ناوشار مامۆستای پێویست نەبوو، ئەوا ئەو مامۆستایانەی دەگوازرێنەوە لە بازنەیەکی نزیک دادەنرێن، کە پێویستی پێ هەبێت.

شەشەم: ئەو مامۆستایانەی خزمەتی دەرەوەی شاریان تەواو نەکردووە ، دەبێت خزمەتی دەرەوەی شار تەواو بکەن بەپێی رێنماییەکان.

حەوتەم: گواستنەوەی بە ئاڵوگۆڕ ئەنجام بدرێت، دەبێت لە هەمان پسپۆڕی خۆی بێت و سەنتەری هەولێر ناگرێتەوە.

هەشتەم: گواستنەوە لە نزیک بۆ دوور بەبێ بنەما دەبێت.

نۆیەم: گواستنەوەی بە راپۆرتی پزیشکی تەنیا کار بە لیژنەی پێداچوونەوەی هەمیشەیی دەکرێت، دەبێت راپۆرتی پزیشکی لەلایەن لیژنەی گواستنەوە لە بەڕێوەبەرایەتی گشتی پەروەردەی هەولێر پەسند بکرێت و بڕیاری کۆتایی لەسەر بدرێت.

دەیەم: دوا مۆڵەت بۆ گواستنەوە 1-10-2016 دەبێت.

یازدە: ئەو مامۆستایانەی داوای گواستنەوە دەکەن لە پارێزگای دیکە بۆ پارێزگای هەولێر ئەگەر ماوەی خزمەتی فعلی لە 7 ساڵ کەمتر بێت ئەوا لە سەنتەری هەولێر دانانرێت و مافی گواستنەوەت نییە بۆ هەمان ئەو شوێنەی کە لێی هاتووە لە هەمان ساڵ.

دوانزە: ئەگەر هەر مامۆستایەک کۆی خاڵەکانی یەکسان بوو بەو خاڵانەی کە بەرامبەر پەروەردەکان دیاریی کراوە پێویستە نووسراوی بۆ بەرز بکرێتەوە بە مەبەستی گواستنەوە.

ئەلف: پەروەردەکانی (رواندز ، سۆران ، چۆمان ، مێرگە سۆر)

* پێویستە کۆی خاڵەکان بگاتە 24 خاڵ، بە مەرجێک بەڕێوەبەری قوتابخانە و سەرپەرشتیار رەزامەند بن.

ب: پەروەردەکانی شەقڵاوە و کۆیە

* پێویستە کۆی خاڵەکان بگاتە 20 خاڵ، بە مەرجێک بەڕێوەبەری قوتابخانە و سەرپەرشتیار رەزامەند بن.

ج : پەروەردەکانی خەبات و مەخموور

* پێویستە کۆی خاڵەکان بگاتە 42 خاڵ، بە مەرجێک بەڕێوەبەری قوتابخانە و سەرپەرشتیار رەزامەند بن.

* هەر مامۆستایەک کە داوای گواستنەوە دەکات لە سەرجەم پەروەردەکانی دیکە بۆ پەروەردەی ناوەندی هەولێر، ئەگەر کۆی خاڵەکانی بگاتە 72 خاڵ ئەوا دەکرێت نووسراوی گواستنەوەی بۆ بەرز بکرێتەوە.




rudaw