سەڵاحەدین دەمیرتاش هاوسەرۆكی هەدەپە لە لێدوانێکیدا بۆ رۆژنامەی (جمهوریەت)ی تورکی لێدوانێکی جەمیل بایک رەتدەکاتەوە کە وتبووی " شەڕ بۆ ناو شارە گەورەکانی تورکیا دەگوازینەوە ، وتی " ئەو راگەیاندنە بەڕاست نازانم و قبوڵیشی ناکەم. ئەوەی لەم سەردەمەدا پەکەکە پێویستە بیکات بانگێشتکردن و فراوانکردنی ئەگەرەکانی ئاشتییە و وەكو هەدەپە ئاشتیمان دەوێ‌ نەك شەڕ "

هاوسەرۆكی هەدەپە رایگەیاند، گواستنەوەی شەڕ بۆ ناو شارەکان واتە کوشتنی زیاتری هاووڵاتیانی مەدەنی کە ئەوەش زۆر مەترسیدارە. وتیشی "هیوادارم هەموو کەسێک بە هێمنی و دوور لە گرژی بانگەواز بدات و بەشداری لە بەدیهێنانی ئاشتی بکات"

دەمیرتاش سەبارەت بە چارەنوسی عەبدوڵا ئۆجەلان رایگەیاند، بێ ئاگایی لە بارودۆخی ئۆجەلان ئاڵۆزی دروستکردوە و وتی " لە ساڵی ١٩٩٩دا کاتێک ئۆجەلان دەستگیرکرا دەیان کەس خۆیان سوتاند. ئێستاش نازانین ئۆجەلان مردووە یان سەلامەتە، بریندارە و لە چ بارودۆخێکدایە. دەبێت شەوی کودەتاکە چی بەسەرهاتبێت. لەو باوەڕەدام لێدوانەکەی پەکەکەش لەوەوە سەرچاوەی گرتوە، بۆیە پیویستە حکوومەتی تورکیاش لەو بابەتەدا هەوڵی خۆی بدات".



خۆر