گوتەبێژی وەزارەتی كارەبای هەرێمی كوردستان دەڵێ، لە چوارچێوەی چاكسازییەكانی حكوومەتی هەرێم بۆ زیادكردنی داهات، لە ئێستادا كار لەسەر پێدانی كارەبا بە كەرتی تایبەت دەكرێت.

(حەمەد ئەمین هەورامی)، بە ماڵپەڕی فەرمیی پارتی دیموكراتی كوردستانی ڕاگەیاند: "لە چوارچێوەی بەرنامە چاكسازییەكانی حكوومەتی هەرێمی كوردستان كە بە هۆی قەیرانی دارایی و دابەزینی نرخی نەوت و ئەو جەنگەی لەگەڵ داعش هەیە، دەستی پێ كردووە بۆ كەمكردنەوەی خەرجییەكانی حكوومەت، كار لەسەر پێدانی كارەبا بە كەرتی تایبەت دەكرێت كە خەرجییەكی زۆری دەوێت، بۆیە شارەزاكانی بانكی نێودەوڵەتی و هەرێمی كوردستان هەستمان پێ كردووە، كەرتی دابەشكردنی كارەباش لەبەر ئەوەی كەرتێكی، دەبێت كۆنتڕۆڵی بكەین، بۆیە ویستمان سوود لە خزمەت و شارەزایی وڵاتانی دنیا وەربگرین، بانكی نێودەوڵەتییش ڕاوێژكاری هێناوە و ئەم ڕاوێژكارانە شارەزان لەوەی چۆن بتوانین خەرجیی كارەبا كەم بكەینەوە و چۆن بتوانری كۆنتڕۆڵی دابەشكردنی كارەبا بكەین، بۆ ئەمەیش سوود لە كەرتی تایبەت وەردەگرین."

(هەورامی) گوتیشی: "لە ئێستاشدا هاوكارێكی باش دەبێ بۆ حكوومەت، بەڵام ئەمە مانای ئەوە نییە كە هەندێك كەس تەفسیریان كردووە گوایە وەزارەتی كارەبا دەفرۆشرێ، لەوانەیە هەندێك ریفۆرم لە دابەشكردنەكەدا بكرێ كە ئەمە پلانێكی درێژخایەنە و ڕێك چەند ڕۆژێكی تر ناكرێت، بەڵكە ئێستا حكوومەت كاری لەسەر دەكات، بەڵام بۆ نرخ هەر وەك پێشووە و حكوومەت خۆی چاودێری دەكات، وەلێ بۆ ئەوانەی بازرگانی بە كارەباوە دەكەن، حیسابێكی جیاوازیان لەگەڵدا دەكرێـت."










KDP