هەڵسووڕاوێکی بزووتنەوەی گۆڕان کە لە سەر پشکی ئەو بزووتنەوەیە لە پۆستی جێگری پارێزگاری سلێمانییە، وەڵامی ئەو هەڕەشانە دەداتەوە کە لێی دەکرێت و ئامادەیی خۆی بۆ لێپرسینەوە دەردەبڕێت.

دوای ئەوەی هەڵمەتێکی گەورە لە تۆڕە کۆمەڵایەتییەکانەوە لە لایەن پەیج و ئەکاونتی لایەنگرانی گۆڕان لە دژی سەردار قادر، جێگری پارێزگاری سلێمانی لە پشکی گۆڕان بەڕێوەچوو و بە گەندەڵی تۆمەتبار کرا کە سەرجەمیان یەک وتاریان دانابوو.

ئەمڕۆ چوارشەممە 3\8\2016، سەردار قادر، هەڵسووڕاوی بزووتنەوەی گۆڕان و جێگری پارێزگاری سلێمانی، ڕایگەیاند: “من ئێستا پۆستێکی حکوومیم هەیە و هەڵسووڕاوی بزووتنەوەی گۆڕانم، تائێستا بەشێوەیەکی فەرمی لەلایەن گۆڕانەوە ئاگادار نەکراومەتەوە، بەڵام لە تۆڕە کۆمەڵایەتییەکانەوە ئەو بابەتە لەدژی من بڵاو کراوەتەوە”. بێ ئاگایی خۆشی لە وردەکارییەکانی ئەو هێرشە دەربڕی و گوتی: “هەر کەسێک کار بکات ڕوبەوووی کێشە دەبێتەوە، لە کاتێکدا گومانم لەکەس نییە و بەردەوامم لەکاری خۆم".

ئەو هەڵسووڕاوەی گۆران لە لێدوانەکەیدا جەختی لەوە کردەوە: “ئەم نووسینە ساردم ناکاتەوە، لە کارکردن، حزبەکەم کار دەکات و خۆی ئاگاداری ئەو هێرشانەیە کە لە سەرم هەیە و ئامادەم بۆ لێژنەی لێکۆڵینەوە ئەگەر لە لایەن نەوشیروان مستەفاوە پێکبهێنرێت، بەڵام ئەمە هۆکاری ئەوەیە کە دەنگۆ بڵاو بووەتەوە کە من شوێنی پارێزگاری سلێمانی دەگرمەوە".









باسنیوز