بەپێی هەواڵی ماڵپەڕی فەرمیی حکوومەتی هەرێمی کوردستان، لە کۆبوونەوەیەکی وەزارەتی دەرەوەی ئەمەریکا کە دوێنێ هەینی بۆ نوێنەرانی زیاتر لە ٣٠ وڵات لەوانە یەكێتیی ئەورووپا، یونسکۆ، یو ئێن ئێچ سی ئاڕ، رێکخراوی ئیسلامی بۆ هاوکاری، و نەتەوە یەكگرتووەكان ڕیکی خستبوو، شاندی حکوومەتی هەرێمی کوردستانیش تێیدا بەشدار بوو.



ئەو کۆبوونەوەیە کە دوێنێ هەینی2016 -7 -29 بە مەبەستی تاوتوێکردنی ئەو شێوازانە ڕێک خرابوو کە کۆمەڵگەی نێودەوڵەتیی دەتوانێت بەکاریان بهێنێت بۆ پاراستنی فرەچەشنیی ئایینی و نەتەوەیی لەو ناوچانەی گرووپی توندڕەوی داعش دەستی بەسەردا گرتبوون.



شاندی حکوومەتی هەرێمی کوردستان وەك بەشێک لە شاندی عێراق بەشداریی کۆبوونەوەكانی کرد، شانبەشانی نوێنەرانی ئێزیدی، ئاشووری، توركمان و باڵیۆزخانەی عێراق لە کۆبوونەوەکەدا بەشدار بوون.



لە وتارەکانی دەستپێکی کۆنفرانسەکەدا، جێگری وەزیری دەرەوەی ويلایەتە یەكگرتووەکان ئەنتۆنی بلنکن گوتی هاوکاریی کۆمەڵگەی نێودەوڵەتیی بەشێکە لە "کاری سەخت و بێوچان بۆ سەقامگیری و ئاشتەوایی و حوکمی خۆجێی، کە دەبنە مایەی دڵنیابوون لەوەی کاتێك داعش دەبەزێنرێت، هەر بە بەزیویی بمێنێتەوە".



لە کۆبوونەوەکەدا لەژێر ناونیشانی "هەڕەشەی سەر کەمینەی ئایینی و نەتەوەیی ژێر دەستی داعش، بەیان سامی عبدالرحمن، نوێنەری حکوومەتی هەرێمی کوردستان لە ويلایەتە یەكگرتووەكانی ئەمەريكا و ئەمیر مەولوود بەرپرسی هۆبەی پێکەوەژیانی ئایینەکان لە وەزارەتی ئەوقافی حکوومەتی هەرێمی کوردستان، نوێنەرایەتیی حکومەتی هەرێمی کوردستانیان کرد.



کۆبوونەوەکە لەلایەن باڵیۆزی تایبەتی ئازادیی ئایینی نێودەوڵەتیی دێڤید ساپەرشتین و ڕاوێژکاری تایبەتی کەمینە ئاینییەکان نۆکس سامسەوە میواندارێتی کرا.



کۆبوونەوەکەی دوێنێ بەدواداچوونە بۆ کۆنفرانسەکەی پاریس کە لە ئەیلولی 2015 ساز کرا و تێیدا لایەنەکان رێک کەوتن لەسەر پلانێکی کار.



ڕۆژی پێشوو، نوێنەری حکوومەتی هەرێمی کوردستان بەیان سامی ئامادەی کۆبوونەوەیەكی تر بوو بوو لەسەر هەمان بابەت لەگەڵ لایەن و ئەندامانی دەستگاکانی کۆمەڵگەی مەدەنی، کە پرۆژەی ئازادیی ئایینەكان لە زانکۆی جۆرج تاون رێکی خستبوو.









باسنيوز