سەرۆك بارزانی پێشوازی لە سەركردایەتیی پارتی دیموكراتی كوردستان باكوور دەكات
لەدیدارەكەدا سەرۆك بارزانی پیرۆزبایی بەستنی كۆنگرەی یانزەهەمی پارتی دیموكراتی كوردستان باكوور كرد و هیوای سەركەوتنی بۆ خواستن و ئومێدی ئەوەی خواست كۆنگرەكەیان ببێتە هەوێنی سەركەوتن لە بەرنامەكانیان و كاركردن بۆ خەباتی سیاسی و یاسایی و قووڵكردنەوەی پێكەوەژیان و میانڕۆیی و دیموكراسی و پشتیوانیی خۆیشی بۆ خەباتی نەتەوەیی و ئاشتیانەی لایەنە كوردییەكانی توركیا دووپاتكردەوە. لەدرێژەی قسەكانیدا سەرۆك بارزانی داوای یەكگرتن و لەیەكترنزیكبوونەوەی هێزە نەتەوەیی و دیموكراتەكانی باكووری كرد و داوای كرد كە پشتیوانی یەكتر بن و كاری هاوبەش و هەماهەنگیان لەگەڵ یەكتردا هەبێت. هەروەها جەختیشی لەوە كردەوە كە گەلی كوردستان هەمیشە بەشێك بووە لە چارەسەر و ئاشتی دەوێت و نیگەرانیی خۆیشی لە بارودۆخی نالەباری هاووڵاتیانی كورد لە توركیا نیشاندا و وێڕای ئاماژەدان بە خەباتی ئاشتیانە بە پێویستی زانی كە كۆتایی بە خوێنڕشتنی نێوان كورد و تورك بهێنرێت چونكە ڕێگەی ڕاست تەنیا ئاشتی و پێكەوەژیانە و پێویستە هەموو لایەك خۆیان لە گرژی و توندوتیژی دوور بكەنەوە. لەبارەی بارودۆخی سیاسیی توركیاش سەرۆك بارزانی ئەوەی دووپاتكردەوە كە لەدژی هەموو هەوڵێكی كۆدەتا و سەربازین بۆ لابردن و حكوومەتێكی شەرعی كە هاووڵاتیان دەنگیان پێ داوە.
لەبەرانبەردا شاندی میوان سوپاسی پشتگیری و هەڵوێستی سەرۆك بارزانیان كرد و ڕایەنگەیاند لەسەر پڕەنسیپە ئاشتیخواز و نەتەوەییەكانی ڕێبازی بارزانیی نەمر بەردەوام دەبن چونكە بەدیهێنەری ئاشتی و سەقامگیری و پێكەوەژیانە. هەروەها سوپاسی ڕێنمای و ئامۆژگارییەكانی سەرۆك بارزانیان كرد و پێزانینیان بۆ خەمخۆریی سەرۆك بارزانی هەبوو بۆ دۆزی ڕەوای گەلی كوردستان لە پارچەكانی تر.
جێگەی ئاماژەپێكردنە لەم كۆبوونەوەیەدا كاكەمین نەجار ئەندامی مەكتەبی سیاسی و هێمن هەورامی و ئەحمەد كانی ئەندامانی ئەنجوومەنی سەركردایەتیی پارتی دیموكراتی كوردستان ئامادە بوون.
