راوێژکارێکی سەرۆکی حکومەتی هەرێمی کوردستان رایدەگەیێنێت بڕینی بودجە لەلایەن بەغدا، شەڕێکی دیکەی داعشیانەبوو دژی هەرێمی کوردستان و، "کەسێک هیوا و ئومێدی بە عێراق هەبێت لە سیاسەت تێنەگەیشتووە".

زیرەک کەمال، راوێژکاری سەرۆکی حکومەتی هەرێمی کوردستان بۆ کاروباری رۆشنبيری و، ئەندامی مەکتەبی سیاسی حیزبی شیوعی کوردستان لەکاتی بەشداریکردنی لە گەشتی هەواڵەکانی تۆڕی میدیایی رووداو لەبارەی "گرنگی یەکدەنگبوونی کورد بەرامبەر بەغدا و پێکهێنانی شاندێکی یەکگرتوو بۆ دانوستاندن لەگەڵ حكومەتی عێراق"، رایگەیاند "لەمێژووی شەڕ و ئاشتی و لەو کاتەوەی کۆمەڵگای مرۆڤایەتی بەسەر چینەکاندا دابەشبووە، ئەگەر ئیرادەیەک بۆ شەڕ هەبووبێت، ئیرادەیەکیش هەبووە بۆ ئاشتی".

راوێژکارەکەی سەرۆکی حکومەت پێی وایە "هیچ کێشەیەک نییە چارەسەر نەکرێت، ئەزموونی ژیانیش دەریخستووە، قورسترین کێشە و ململانێ، ئەوانەی رەهەندی نیشتمانی، نەتەوەیی، ساسی، حیزبی و مەزهەبیشیان هەبێت، ئەوەندەی دەتواندرێت بەدیالۆگ ئەنجامی ئیجابیان هەبێت لە رێگە تووندوتیژییەوە نایگەینێ".

زیرەک کەمال هەروەها دەڵێ " لە قۆناخی ئێستا هەموو بەڵگەنامە و رووداوە سیاسییەکان پێمان دەڵێن ئێمە جیا لەوەی بەڕووی دەرەوە بە قۆناخێکی گەش و ئاڵدا تێپەڕ دەبین، بەشداری گەلی کورد و پێشمەرگە لە شەڕی داعش ئێمەی خستە سەر نەخشەی سیاسی زیندووی جیهان، بەڵام لەهەمان کاتدا کۆمەڵێک مەترسی زۆر گەورە لەسەر هەرێمی کوردستان هەن".

لەبارەی جۆری مەترسییەکانیشەوە زیرەک کەمال دەڵێ " هەموو ئەو مەترسیانەی ئێستا رووبەڕووی هەرێمی کوردستان دەبنەوە، لە قۆناخی دوای داعش، رووبەڕووبوونەوەی حەشدی شەعبی، کە من هیچ کاتێک مەترسییەکانیان لە داعش بەکەمتر نابینم، بڕینی بودجە لەلایەن بەغدا، کە شەڕێکی دیکەی داعشیانەبوو دژی هەرێمی کوردستان، لە رێگەی یەکبوون و یەکڕیزی و تەبایی نێوان هێز و لایەنەکان دەتوانین رووبەڕوویان ببینەوە".

سەبارەت بەوەی "هیچ ئومێدێک بە بەغدا ماوە بۆ ئەوەی کورد لە بەرامەبەریدا یەکدەنگ بێت؟" زیرەک کەمال پێیوایە "لە ساڵی 2003وە کاتێک سەدام رووخا، گوتم یەکەم هەنگاونانی کورد ئەگەر بڕیارە بمێنێتەوە لەگەڵ عێراق، کە من دژیمە، دەبێت کار لەسەر گۆڕینی ناوی عێراق بکات، چونکە ناشرینترین دەوڵەت لە مێژووی هەموو کۆمەڵگای مرۆڤایەتی دەوڵەتی عێراقە".

راوێژکارەکەی سەرۆکی حکومەت هەروەها دەڵێ دەڵێت: " لەدوای رووخانی سەدام تاوەکو ئێستا، دەرفەتێکی گەورە لەبەردەممان هەبوو، ئێمە لە قۆناخە سیاسییەکە تێنەگەیشتین، ئێمە کۆمەڵێک لە ئەدیب و نووسەر و رۆشنبیران لەدوای رووخانی سەدام، بزووتنەوەی ریفراندۆممان دروستکرد، بە سەرکرادیەتی سیاسیمان گوت دەستمان دامێنتان فریاکەون عێراق عێراقی ئێمە نییە، هەرچی بکەین بۆ ئەو عێراقە، بە برا بچووکیش قبووڵمان ناکات".

لە کۆتاییشدا زیرەک کەمال، راوێژکاری سەرۆکی هەرێمی کوردستان بۆ کاروباری رۆشنبیری و ئەندامی مەکتەبی سیاسی حیزبی شیوعی کوردستان جەختی کردەوە لەوەی " دەبێت ئێمە بەو ئومێدو میکانیزم و ئەقڵیەتە کار بکەین، کە ئێمە لەگەڵ عێراق نە خزمین، نە هیچ شتێک کۆماندەکاتەوە، من لە سەرچاوەیەکی شۆڤێنیزمەوە ئەو قسەیە ناکەم، بەڵام عێراق بەدرێژایی مێژوو زەمینێک نەبووە بۆ عەرەب خۆیشی، هەرکەسێک هیوا و ئومێدی بە عێراق هەبێت بڵێت بەرەو دیموکراتیەت و عێراقی دەستووری و زامنکردنی مافەکانی گەلی کورد دەڕوات، من پێموایە لە سیاسەت تێنەگەیشتووە".




رووداو