ئه‌مرۆ به‌ ئاماده‌بوونى كه‌ریم سنجارى وه‌زیرى پێشمه‌رگه‌ى هه‌رێمى كوردستان به‌ وه‌كاله‌ت و فه‌ریق جه‌بار یاوه‌ر ئه‌میندارى گشتى وه‌زاره‌تى پێشمه‌رگه‌ و ژماره‌یه‌ك له‌ ئه‌فسه‌ر و پله‌دارانى وه‌زاره‌تى پێشمه‌رگه‌ كۆبونه‌وه‌ى ئاسایى هه‌فتانه‌ى خۆى ئه‌نجامدا و له‌و كۆبونه‌وه‌یه‌دا هه‌لسه‌نگاندنى دوایین رووداو و پێشووه‌چونه‌كانى هێزى پێشمه‌رگه‌ له‌ به‌ره‌كانى شه‌ر، له‌گه‌ل فه‌رمانده‌ و ئه‌فسه‌رانى ولاتانى هاوپه‌یمان و هه‌ماهه‌نگ له‌ رووبه‌رووبونه‌وه‌ى تیرۆریستانى داعش كرا.

له‌ سه‌ره‌تاى ئه‌و كۆبونه‌وه‌یه‌دا له‌ لایه‌ن بنكه‌ى ئۆپراسیۆنى هاوبه‌شى وه‌زاره‌تى پێشمه‌رگه‌ پوخته‌ى راپۆرتى گۆرانكارى و پێشه‌وه‌چوونه‌كانى كۆى میحوه‌ره‌كانى شه‌ر له‌ رووى پێشره‌وى و بوردومانى هێزه‌ ئاسمانییه‌كانى هاوپه‌یمانان خرایه‌روو.

پاشان له‌ لایه‌ن وه‌زیرى پێشمه‌رگه‌ به‌ وه‌كاله‌ت تیشك خرایه‌ سه‌ر به‌رده‌وامى مه‌شقه‌ سه‌ربازییه‌كان و كه‌مكردنه‌وه‌ى زه‌ره‌ر و زیانه‌كانى هێزه‌كانى پێشمه‌رگه‌.

دواتر له‌ لایه‌ن ئه‌فسه‌ر و فه‌رمانده‌كانى هاوپه‌یمانان زانیارى و ورده‌كارى زیاتر له‌باره‌ى رووداو و پێشهاته‌ سه‌ربازییه‌كانى ناوچه‌كه‌ باسى لێوه‌كرا. له‌ كۆتایى ئه‌و كۆبونه‌وه‌یه‌شدا گرنگى دانى زیاتر به‌ مه‌شقه‌ سه‌ربازییه‌كان و هاوكارى و هه‌ماهه‌نگى به‌رده‌وامى هاوپه‌یمانان بۆ هێزه‌كانى پێشمه‌رگه‌ دووپاتكرایه‌وه‌.