سوپاسالاری كوردستان: پێشمهرگه هەموو شوێنێکی پێ ڕزگار دەکرێ و، چاوهڕێی سهعاتی سفره
لە دیدارێكی تایبەتدا بۆ گۆڤاری گوڵان فەریق جەمال سوپاسالاری كوردستان ڕایگهیاند كه سەرۆكئەركانی سوپای ئەمەریكا كە تازە ئەو پۆستەی وەرگرتووە، ویستی بەم سەردانیكردنەی كوردستان لە نزیكەوە ڕەوشی ناوچەكە و دۆخی پێشمەرگە ببینێت، هەر لەو دانیشتنەدا سوپاسی سەرۆكی كوردستان و هێزی پێشمەرگەی كردو سەرەخۆشی خۆی بۆ شەهیدەكانمان دەربڕی، ستایش و سوپاسی پێشمەرگە كرد كە هێزی یەكەمن لە جیهاندا بۆ بەرەنگاربوونەوەی داعش كە داعشیان تێك شكاندووە. هەروەها پەیامێك بوو بۆ پاڵپشتی و پشتیوانیی لێمان، بۆ ئەوەی پێمان بڵێن كە داواكارییەكانمان دەگەیێننە پنتاگۆن و كۆنگرێسی ئەمەریكا، بۆ ئەوەی بزانن كە خاوەنی هاوپەیمانێكی بەهێزن لە ناوچەكەدا، كە بریتییە لە هێزی پێشمەرگە. هەروەها ویستی بزانێت چ پێداویستییەكمان هەیە بۆ ئەوەی لە گەڕانەوەدا باسی بكات، كە ئێمە دوایی لە ڕێی ئەو تیمە ئەمەریكاییانەوە لێرەن و، لە ناو ژووری عەمەلیات لێرە كار دەكەن، بۆیانی دەنێرین."
فەریق جەمال دهیشڵێت: "ئەو كۆبوونەوەیە لەگەڵ هێزەكانی شنگالدا ئەنجام درا، ئەو هێزانەی حاڵی حازر لە بنكەی مەشق و ڕاهێنان فیشخابووردان و سەرقاڵی ڕێكخستنەوەیانین، ئەم هێزەش پێك هاتووە لەو پێشمەرگانەی كە لە چیای شنگالدا بوون و، سەرەتا بەسەر چەند گرووپێكدا دابەش ببوون، كە دواتر كۆ كرانەوە و چەند فەوجێكیان لێ پێك هێنرا بە ئامانجی دروستكردنی هێزێكی ڕێكخراو. هەر فەوجێكیش لە 400 كەس پێك دێت و، تا ئێستاش دوانزە سێنزە فەوج بە تەواوی ئامادە بوون. ئەمە ئامانج و تەوەری كۆبوونەوەكەی ئێمە بوو لەگەڵ فەرماندەیی شنگالدا، واتە بۆ ئەوەی ئەرك و فەرمانەكان بەسەر ئەو فەوجانەدا دابەش بکەین کە تەواو بوونە؛ بۆ ئەوەی ئامادەكاری خۆیان بكەن و چەك و كەلوپەلی پێویستیان بۆ دابین بكرێت."
جەمال هەروەها ئاماژهیشی كرد: "لە دووەم ڕۆژی مانگی ئابدا داعش هێرشی كردە سەر ئەم ناوچانە و لە 3ی مانگدا دەستی بە سەر بەنداوی مووسڵ و زوممار و شنگالدا گرت تاوەكو نزیك مەفرەقی سحێلا؛ دوایی ئێمە بە بڕیاری جەنابی سەرۆك دەستمان كرد بە داڕشتنی بەرنامەیەك كە سەرۆك خۆیشی هاتە ئەم ناوچەیە و، ڕاستەوخۆ سەرپەرشتی كۆبوونەوە و بەرنامە و، پرۆسەكانیشی دەكرد. لە ئەنجامدا توانیمان بە چوار قۆناخ سەرجەم ئەو ناوچانە ڕزگار بكەینەوە، تا گەیشتینە شنگال و ئاسكی مووسڵ، بەنداوی مووسڵ و چیای بادۆش و ناوچەی قەسریج تا دەگاتە حەردان تا گەیشتینە ڕەبیعە و چیای شنگال. لە ڕۆژی 19 و20ی مانگی كانوونی یەكەم گەیشتینە سەر چیای شنگال. ئێستاش سەرجەم ئەم ناوچانە لە ژێر كۆنتڕۆڵی پێشمەرگەدن."
لە كۆتایی قسەكانیدا فەریق جەمال هەروەها گوتی: "تێكڕای پرۆسەكان بە سەرپەرشتیی ڕاستەوخۆی سەرۆك بارزانی پلان و بەرنامەی بۆ دادەڕێژرا و، خۆی ڕێنمایی فەرماندە مەیدانییەكانی دەكرد، كاتێك پلان بۆ ڕزگاركردنی هەر ناوچەیەك دادەنرا، ئیدی بۆ زومار بووبێت یان بۆ ڕەبیعە یان بۆ چیای شنگال. لێرەدا من دوو نموونە دەخەمە ڕوو، یەكەمیان لە پرۆسەی ڕزگاركردنی ڕەبیعەدا، سەرۆك بارزانی پلانی ئەوەی داڕشت كە دەبێت سەرەتا ڕێگای عوێنات و ڕەبیعە بگیرێت، پێش ئەوەی ڕەبیعە بگیرینەوە، لە ئەنجامی جێبەجێكردنی ئەم پلانەشدا توانرا بە ئاسانی ڕەبیعە ڕزگار بكرێت. نموونەیەكی دیكە ئەوەیە كە كاتێك ئێمە ویستمان بچین بۆ شنگال ڕێگەیەكمان لە بەردەمدا نەبوو، ناچار دەبووین بە هێڵی ڕەبیعە و میشیلفەوە بچین بۆ سنونێ و، لەوێوە بچین دەروازەیەك بۆ شنگال بكەینەوە، بەڵام جەنابیان پێی ڕاگەیاندین كە نەخێر با لێرەوە ئێمە پشتی دوژمن بگرین، واتە لە ناوچەی قەسریج بۆ مەفرەقی عەیادێ بۆ حەردان، كاتێك پلانەكە جێبەجێ كرا چاک سەری گرت، دوژمن هەمووی تێك شكا و، تەنانەت نەیانتوانی دەربازیان بێت و، ناچار بوون بەرەو سووریا هەڵاتن. ئەمە دوو نموونەیە لەبارەی ئەوەی جەنابی سەرۆك چەند وردەكارییەكان لەبەرچاو دەگرێت و، چۆن ڕۆدەچێتە ناو وردەكارییەكانی هەر پرۆسەیەكەوە، لەوەش زیاتر هەر خۆی سات بە سات سەرپەرشتی جێبەجێكردنی پلانەكانی دەكرد و، بەدواداچوونی بۆ ڕەوشی بەرەپێشچوون و، پەرەسەندنەكانی پرۆسەكان دەكرد."
گوتیشی كه پێشمهرگه توانا و ئیڕادهی رزگاركردنی هەموو شوێنێکی ههیه و، چاوهڕێی سهعاتی سفره.
