شاندێکی باڵا لە فەرماندەکانی پێشمەرگەی کوردستان لە سەر داوا و بانگێشتی فەرمی پەرلەمانی ئەوروپا سەردانی ستراسبۆرگ دەکات و بەشداری لە کۆبوونەوەی فەرمی لێژنەی پەیوەندیەکانی دەرەوەی پەرلەمانی ئەوروپای تایبەت بە دۆسەی عێراق دەکات . هەروها بڕیارە شاندی پێشمەرگە لە گەڵ لێژنەی ئاسایش و بەرگری پەرلەمانی بەلجیکا و ئەنجومەنی پیرانی ئەو وڵاتەش کۆبێتەوە . لە بەشێکی تری سەردانەکە چەند دیدارێک ئەنجام دەدەن لە گەڵ نوێنەرانی چەند وڵاتێکی ئەوروپی ئەندام لە ناتۆ .

سەردان و کۆبوونەوەی فەرمی بۆ هەر یەک لە پەرلەمانی ئەوروپا و پەرلەمانی فێدێرالی بەلجیکا و ئەنجومەی پیرانی بەلجیکا لە درێژەی کار و چاڵاکیەکانی نوێنەرایەتی حکومەتی هەرێمی کوردستان لە یەکێتی ئەوروپا دێت بە ئامانجی گفتگۆ و ڕاگۆڕینەوەیە سەبارەت بە بارودۆخی هێزی پێشمەرگەی کوردستان لە جەنگی دژی داعش و گەیاندنی داخوازی و پێداویستیەکانی پێشمەرگە بە لایەنانە. ئەم کوبوونەوانە دەبنە دەرفەتێک بۆ شاندی باڵای پێشمەرگە بۆ ئەوەی لە رێگەی پەرلەمانی ئەوروپا فشار بخەنە سەر وڵاتانی ئەندام لە یەکێتی ئەوروپا بۆ ئەوەی چەک و پێداویستی کاریگەرتر پێشکەشی هێزی پێشمەرگەی کوردستان بکەن.

ئەمە لە کاتێکدایە کە ئەنجومەنی پەرلەمانی ناتۆ لە کۆبوونەوەی ساڵانەی خۆی بڕیاری دا و داوای لە ناتۆ کرد بۆ مامەلەکردنی جددی تر لە گەڵ پێشمەرگە بە پێدانی چەک و پێشکەش کردنی مەشق و راهێنان بۆ هێزەکانی پێشمەرگە.