لە ئێرانی ئیسلامی چوار مێرمنداڵی كورد مەترسیی لەسێداردانیان لەسەرە
هەواڵدەریی هێرنانا ناو و شوناس و حوكمی ئەو چوار مێرمنداڵەی ئاشكرا كردووە كە هەموویان بە تۆمەتی كوشتنی خەڵك سزای سێدارەیان بۆ بڕاوەتەوە.
ناسنامە و تەمەنی ئەو چوار مێرمنداڵە كوردە كە كاتێك تاوانەكەیان ئەنجام داوە بەم چەشنەیە:
1 ـ یووسف محەمەدی لەدایكبووی 1996 و كاتێك دەستگیر كراوە 14 ساڵان بووە. 2 ـ هێمن ئەورامی نەژاد لەدایكبووی 1998 و كاتێك دەستگیر كراوە تەمەنی 17 ساڵ و 9 مانگ بووە. 3 ـ سیاوەش مەحموودی لەدایكبووی 1996 و كاتێك دەستبەسەر كراوە تەمەنی 14 ساڵان بووە. 4 ـ ئامانج حوسێنی (ئۆوەیسی) و كاتێك دەستگیر كراوە تەمەنی 17 ساڵ بووە.
لەناو ئەو چوار كەسەدا سیاوەش مەحموودی راگەیاندووە كاتێك ویستوویانە دەستدرێژی بكەنە سەری، بەرگریی لەخۆی كردووە و تووشی تاوانی كوشتن بووە.
هەمان سەرچاوە ئاماژەی بەوەش داوە كە “كەیوومەرس نەسیری”ش یەكێكی دیكە لە مێرمنداڵە دەستگیر كراوەكانە كە لە ئەنجامی شەڕێكدا لەناو پاركی “شكۆفە”ی سەقز تووشی تاوانی كوشتن بووە و كەسێكی بەناوی “ئەیووب عەبدی” كوشتووە.
دۆسیەی كەیومەرس نەسیری لە دادگە بە كراوەیی ماوەتەوە و هێشتا هیچ حوكمێكی بۆ نەبڕاوەتەوە.
لە ئێران بەپێی یاسای تاوان بۆ كوڕان تەمەنی 15 ساڵ و بۆ كچانیش 9 ساڵی دیاری كراوە، ئەمە لەكاتێك دایە كە بەپێی كۆنوانسیۆنە نێودەوڵەتییەكان و بەتایبەت كۆنوانسیۆنی مافی منداڵان سزای سێدارەی كەسانی خوار تەمەن 18 ساڵ قەدەغەیە.
پاش هەندێ گۆڕانكاری لە یاسای سزای ئیسلامی لە ئێران لە ساڵی 2012 یاساناس و دادوەرەكان بۆ بڕینەوەی سزای سێدارە بۆ منداڵان، پێگەیشتوویی و باری عەقڵ و ئاوەزی كەسەكە لە كاتی ئەنجامدانی تاوانەكە دەكەنە پێوەر و بەپێی تاقیكردنەوە پزیشكی و تەندروستییەكان حوكم دەدەن.
حەفتەی رابردووش “فاتمە سالبهی” كەلە كاتی ئەنجامدانی تاواندا تەنیا تەمەنی 17 ساڵ بووە، لەلایەن دادگە و زیندانی شیرازەوە لەسێدارە درا.
باسنیووز
