لەکاتێكدا سەرۆکوەزیرانی عێراق لە بارەگای نەتەوەیەکگرتووەکان بوو لە نیویۆرک هێزەکانی پێشمەرگە لە پاککردنەوەی گوندەکانی رۆژئاوای کەرکووک بوون و 15 شەهیدیان دا، بەڵام ئەم ئازایەتییەی هێزەکەی هەرێمی کوردستان کە ئەمریکای سەرسامکرد نەبوویە جێگای ستایشی عەبادی.

حەیدەر عەبادی لە کۆبوونەوەی گشتی نەتەوەیەکگرتووەکان وتارێکی پێشکەشکرد و تێدا باسی رۆڵی وڵاتەکەی کرد لە رووبەرووبوونەوەی تیرۆردا و ستایشی وڵاتانی جیهان و هێزە ئەمنییەکان و حەشدی شەعبی کرد و تەنیا باسی پێشمەرگەی نەکرد.

ئەو رۆژەی عەبادی وتارەکەی خوێندەوە هێزەکانی پێشمەرگە لە رۆژئاوای کەرکووک لە ئۆپەراسیۆنێکدا چەندین گوندیان لە داعش سەندەوە و 15 شەهید و ژمارەیەک برینداریان هەبوو.

عەبادی بەتایبەتی لەسەر حەشدی شەعبی وەستا و ببە هێزێکی حکومی وەسفی کردن و گوتی " هێزێکی دەوڵەتیین و ئازایانە شەڕی داعش دەکەن"، عەبادی هەروەها ناوی هێزە چەکدارەکانی هۆزەکانیشی برد".

ئەو ئۆپەراسیۆنەی پێشمەرگە بووە جیگای دەستخۆشی ئەمریکا.

جۆن کێری، وەزیری دەرەوەی ئەمریکا لە کۆنفرانسێکی ئەمنیدا لە هەمان رۆژ و هەمان ئەو شارەی عەبادی لێبوو گوتی:" لە کاتێکدا، کە من قسە دەکەم پێشمەرگە ئازایانە لە رۆژئاوای کەرکووک چەندین گوندیان لە داعش پاککردووەتەوە".














رووداو -