لە ئەنجامی بۆردوومانی فڕۆکە جەنگییەکانی هاوپەیمانان 17 چەکداری داعش لە باشووری رۆژئاوایی کەرکووک كوژران، سەرچاوەیەکیش دەڵێت هاوپەیمانان چوار كۆگای چۆڵی داعشیان لە شارۆچکەی رەشاد و دەوروبەری حەویجە لە رۆژئاوای کەرکووک تەقاندوونەتەوە.

بەپێی سەرچاوەیەكی ئەمنی عێراقی، ئێوارەی دوێنێ پێنجشەممە 24 ی ئەیلولی2015، فڕۆکە جەنگییەکانی هاوپەیمانان پێگەکانی چەکدارانی داعشیان لە باشووری رۆژئاوایی شاری کەرکووک بۆردوومانکردوون و بەو هۆیەوە داعش زیانی گیانی ماددی زۆری هەبووە.

وەك سەرچاوە ئەمنییەکەی عێراق رایگەیاندووە، بەهۆی بۆردوومانی چڕی هاوپەیمانان 17 چەکداری داعش کوژراون، هاوکات سێ بنکەی گرووپەكەش وێرانکراون و ژمارەیەک ئۆتۆمبێل و چەکی قورسی داعشیش تێکشکێندراون.

هەروەها فڕۆكەکانی هاوپەیمانان چوار كۆگای چەكی داعشیان لە شارۆچکەی رەشاد و دەوروبەری حەویجە لە رۆژئاوای کەرکووک تەقاندوونەتەوە، بەگوتەی سەرچاوەكش، بەو هۆیەوە داعش زیانی ماددی زۆری بەرکەوتووە.









رووداو