نێچیرڤان بارزانی: لەبەر ئەولەویاتی دیكەی ژیان، حكومەت نەیتوانیوە وەك پێویست ئاوڕ لە سینەما بداتەوە
سەرەتا پیشانگایەكی فۆتۆگرافی لەلاین بەڕێز سەرۆك وەزیرانی هەرێمی كوردستانەوە كرایەوە كە ژمارەیەك وێنەی فۆتۆگرافی تێیدا نمایشكرابوون. دواتر ڕێوڕەسمی ڤیستیڤاڵەكە دەستیپێكرد و چەند گوتە لەلایەن ئامادەكارانی ڤیستیڤاڵەكەوە و بەرێز پارێزگای دهۆكەوە پێشكەشكران و دواتر بەڕێز نێچیرڤان بارزانی سەرۆك وەزیرانی هەرێمی كوردستان گوتەیەكی پێشكەشكرد.
لە گوتەكەیدا بەڕێزیان جگە لە بەخێرهێنانی بەشدار و میوانانی ڤیستیڤا بە گشتی و بە تایبەتی ئەوانەی لە ژمارەیەكی زۆری وڵاتانی جیهانەوە هاتوون، دووپاتی كردەوە كە بەشداریان پشتگیرییەكی گەورەیە بۆ خەڵكی كوردستان كە لەبەرامبەر هێزی تاریكپەرست وەستاوە و بەرگریی لە باوەڕ و پرنسیپەكانی مرۆڤایەتی و جیهانی شارستانی دەكات و هیوای خواست لەكاتی گەڕانەوەیاندا ببنە دەنگ و باڵیۆز بۆ كوردستان.
هەروەك بە پشتگیرییەكی گەورەی بۆ خەڵكی بادینان بە شێوەیەكی گشتی زانی كە بەوپەڕی مرۆڤدۆستییەوە پێشوازیان لە زیاتر لە ملیۆنێك و پێنجسەد هەزار ئاوارە و پەنابەری دەستی تیرۆر لە هەموو پێكهاتە نەتەوەیی و ئایینییەكان كردووە و بە هەموو شێوەیەك جێگەی حەوانەوەیان بۆ دابین كردووه.
ئەوەشی خستەڕوو كە گەلی كوردستان گەلێكی ژیان دۆست و مرۆڤ دۆستە و تەنیا لە كاتە زۆر سەختەكانیشدا ئەم سیمایەی خۆی پاراستووە. گەر ناچاربووبێت بە دەستێك چەك هەڵگرێت بەمەبەستی خۆپاراستن، بەردەوام بە دەستەكەی دیكە داهێنانی كردووە و هەوڵی داوە لە جیهانی ئەدەبیات و هوونەر و وەرزش و هەموو بوارەكانی دیكە پاشنەكەوێت و حكوومەتی هەرێمی كوردستانیش بەردەوام لە هەوڵی ئەوەدا بووە ئەم بوارانە پێشبكەوێت و ببێتە خاوەنی بەرهەمێك لە ئاستی بەرهەمە جیهانییەكان.
هەر لە گوتەكەیدا باسی لە گرنگی و كاریگەریی سینەما كرد كە بەهۆی بارودۆخی كوردستان شانسێكی وا بۆ ئەو هونەرە لە كوردستان دروست نەبووە و لەبەر پێویستی بوارەكانی دیكەی ژیانی خەڵكی كوردستان، حكوومەت ناچاربووە وەك پێویست گرنگی بە هونەری سینەما نەدات، بەڵام لەگەڵ ئەمەشدا هەر لەگەڵ دامەزراندنی حكوومەتی هەرێمی كوردستان و بەگوێرەی ئەو توانایەی كە هەیە، حكوومەت هەوڵی داوە گرنگی بەو هونەرە گەورەیە بدات و پشتگیریی كارە سینەماییەكان بكات و هونەرمەند و سینەماكارانی كوردستانیش شاهێدی ئەم قسەیەن ئەمە جگە لەوەی بەشداری ژمارەیەك لەو بەرهەمانە لە ڤیستیڤاڵە جیهانییەكاندا و بەدەستهێنانی خەڵاتی گەورە، بەڵگەیەكی دیكەی پشتگیریی حكوومەتی هەرێمی كوردستانە بۆ كار و بەرهەمە سینەماییەكان.
هەر لەسەر گرنگیی ڕۆڵی سینەما، بەرێزیان ئاماژەی بەوە دا كە سینەما دەنگی زۆرێك لە گەلانی مافخوراوی جیهانی گەیاندوە و بەسەرهاتەكانی گەلی كوردستانیش ماددەی زۆر باش و بەهاداری هونەری سینەمایین، گەر وەك گەلانی دیكەی جیهان گەلی كورد شانسی هەبا و بارودۆخەكەی هاوكار با، ئێستا بە سەدان و هەزاران لە چیرۆكەكانی گەلی كورد وەك ڕاپەڕین و شۆڕشە دێرینەكانی كوردستان، ئەنفال و كیمیاباران، داستان و قارەمانێتییەكانی هێزی پێشمەرگە، كۆچكردن و ئاوارەبوون، چیرۆكی خۆشەویشتی، چیرۆكی هەر خوشكێكی ئێزدی كە لەلایەن تیرۆرستانەوە ڕفێتنراون و بەسەرهاتی ئالانی جوانەمەرگ، بابەتی گەلێك لە شاكارە سینەماییەكانی جیهان دەبوون.
لە بەردەوامی گوتەكەیدا ئاماژەی بەوە دا كە بەردەوامی ئەم ڤیستیڤاڵە لە دهۆك لە بارودۆخی ئەمڕۆی هەرێمی كوردستان كە بە ژمارەیەك كێشە و قەیرانی سیاسی و ئابووری و دارایی تێدەپەڕێت و شەڕێكی گران بەسەر كوردستاندا سەپێنراوە، جێگەی خۆشحاڵییە و بەڵگەیەكی حاشا هەڵنەگریشە كە گەلی كوردستان سەرەڕای هەموو سەختییەكان، گەلێكی زیندووە و دەستبەرداری پێشكەوتن و خۆشەویستی بۆ ژیان نابێت.
لە كۆتایی گوتەكەیدا هیوای سەركەوتنی بۆ سێیەمین ڤیستیڤاڵی نێودەوڵەتی بۆ فیلم لە دهۆك خواست و هەروەك هیوای خواست بارودۆخەكە باشتر ببێت بۆئەوەی چ وەك حكوومەت یان كەرتی تایبەت، زیاتر گرنگی بەو هونەرە گەورەیە بدەن.
ئەمە دەقی گوتەی بەڕێز نێچیرڤان بارزانی سەرۆك وەزیرانی هەرێمی كوردستانە:
گهلى خانم و جوامێرێن ڕێزدار،
مێهڤانێن هێژا..
ئێڤارا وە باش، هون ههمى لایەك بخێر بێن..
بخێرهاتنهكا تایبهت ل وان مێهڤانێن هێژا دكهم یێن كو ژ گهلهك وهلاتێن جیهانێ هاتى و بهشدارى ڤێ ڤیستیڤالێ بووى. بهشداریا وان دڤێ ڕووداوا هونهرى و ڕهوشهنبیریدا، ئهڤرۆ بۆ مهل ههرێما كوردستانێ گەلەك مهعنا هەیە!.
بهشداریا وان، بهرى كو بهشدارییهكا هونهرى بیت، پشتهڤانییهكا مهعنهویا مهزنهبۆ خهلكێ كوردستانێ، كو ئهڤرۆ د مهزنترین بهرۆكا شهڕێ دژى تیرۆرێدا ل ههمبهرى هێزێن تاریێ ڕاوهستایهو، بهڕهڤانیێ ل باوهڕى و پرهنسیپێن مرۆڤانه و جیهانا شارستانى دكهت.
هاتنا وان بتایبهتى بۆ باژێڕێ دهۆكێ و دهڤهرا بههدینا، دیسا پشتگیرییهكا مهزنهبۆ خهلكێ دهڤهرێ، خهلكێ دهۆكێ، زاخۆ، ئاكرێ، ئامێدیێ و ههمى جهێن دى یێن پارێزگهها دهۆكێ، كو پترى ساڵهكێیه گهلهك ب دلگهمى، مرۆڤدۆستانه و ب مێهڤاپهروهرى، پێشوازیا نێزیكى ملیۆنهك و حەفسەد هەتا هەشتسەد هزار ئاوارهو پهنابهرا كریهل دهۆكێ. بێ جوداهى پێشوازى ل ئاوارهو پهنابهرێن ژ ههمى دین و مهزههب و نهتهوهیێن جدا كریه.
جوامێرانهدهرگههێن دهڤهر و گوند و باژێڕێن خۆ، بۆ خوشك و برایێن خۆ یێن مهسیحى، ئێزدى و موسلمان، سوننه و شیعى، كاكهیى و سابیئه، بۆ عهرهب، توركمان، كلد و ئاشوورى و سریان و بۆ كوردا ل ههرێما كوردستانێ، ل عیراقێ و سووریا ڤهكرینه.
پشتگیرى و پێزانینهكا مهزنه بۆ خهلكێ ڤێ دهڤهرێ كو بهرى سالهكێ دهرگههێن قوتابخانه و فێرگههێن خۆ بۆ ئاواره و پهنابهرا ڤهكرن و زارۆكێن وان بۆ دهمهكێ نهیێ كێم ژ خویندنێ بێبهش بوون، داكو هاریكاریا ڤى خهلكێ بهلهنگاز بكهن. ئهڤهژى نیشانهكێ دیار و بهرچاڤێ ژیاندۆستى و مرۆڤدۆستیا خهلكێ مهیهل كوردستانێ و ل دەڤەرا بەهدینان.
ههر ب ڤێ ههلكهفتنێ، جارهكا دى سپاسیا خهلكێ پارێزگهها دهۆكێ بتایبهتى و خهلكێ كوردستانێ بگشتى دكهم، بۆ ڤێ جوامێرى و مرۆڤپهروهریا وان. هاتنا مێهڤانێن مهیێن بیانى، بۆ باژێڕێ دهۆكا خۆشتڤى، بۆ خهلكێ كوردستانێ بگشتى، ههم پشتگیرییه، ههم ژى گهلهك جهێ خۆشحالى و شانازییێ یه. هون جارهكا دى بخێر هاتن، هیڤیدارم دهمهكێ خۆش و پر مفا ل كوردستانێ دهرباز بكهن، ههروهسا دهما كو ڤهدگهرنهڤ وهلاتێن خۆ، ببنهدهنگ و بالیۆزێن هەرێما كوردستانێ. هەمی بخێربێن، سەرچاڤا بێن.
بخێرهاتنەكا گەرم یا قونسڵێت بیانی ئەڤێت ل كوردستانێ و ل هەڤلێرێ نە و ئەڤرۆ بەشدارن دگەل مە د ڤێ مەراسیمێدا، بخێرهاتنەكا تایبەتیا وان ژی دكەم، بخێربێن.
هێژایان..
گهلێ كوردستانێ، گهلهكێ ژیاندۆست و مرۆڤدۆسته، ب درێژیا دیرۆكا خۆ، دگهل وێ ههمى ستهم و زۆرداریا لێ هاتیهكرن، د ڕۆژێن ههرى تهنگدا ژى، چهندى كو دهلیڤهههبووبیت، ئهڤ سیمایێ خۆ یێ ژیاندۆستى و مرۆڤدۆستیێ یێ پاراستى. دگهل ههمى نهخۆشى و دهردهسهریا، حهز و عشقا خۆ بۆ ژیانێ و بۆ بنهما و بنگههێن ژیانا مۆدێرن و پێشكهفتى، وندا نهكرینه.
ئهگهر نهچار مابیت ب دهستهكى چهكى ههلگریت داكو خۆ بپارێزێت، بهردهوام ژى ب دهستێ دى، داهێنان و ئهفراندنا كرى و ههولێن بهردهوام داینه كو ژ جیهانا پێشكهفتى، ژ جیهانا ئهدهبیاتا، ژ جیهانا هونهرێ و وهرزشێ و ههمى وارێن دى یێن ژیانا شارستانى پاش نهكهڤیت. سالێن دویر و درێژێن تێكۆشینا گهلێ مه، ل ههمى پارچهیێن كوردستانێ، گهلهك ناڤێن دیار و بهرچاڤ دڤان وارێن هونهرى و ڕهوشهنبیریدا، دهرخستینە كە جهێ شانازیا گەلێ مە نە ل هەر جهەكێ بن.
ل ههرێما كوردستانێ كو گهلێ مهد ههمى وارادا شانسهكێ مهزنتر ژ بهشێن دى یێن كوردستانێ بدهستڤههات، ب پشتگیریا حكوومهتا ههرێما كوردستانێ د گهلهك وارێن هونهرى، ڕهوشهنبیرى، وهرزشى، ئهدهبى و چهندین وارێن دیدا، ههول دان و بهردهوام ژى ههول ددهت كو پێشڤهبچیت و ببیتهخودانێ بهرههمێن د ئاستا بهرههمێن جیهانێدا.
سینهما كو یهك ژ هونهرێن ههرى بلند و گرنگهو كاریگهریا وێ گهلهكا مهزنه، یهك ژ وان هونهرێن جیهانا پێشكهفتییهكو مخابن ژ دیرۆكا دهركهفتنا وێ و ههتا نها، ژبهر ڕهوشا كوردستانێ و دیرۆكا كو مللهت و وهلاتێ مهتێڕا دهرباز بووى، شانسهكێ زێدهبۆ ڤێ هونهرێ ل كوردستانێ چێ نهبوویه.
دگهل ڤێ چهندێ ژى، ههر ژ دهستپێكا ئاڤابوونا حكوومهتا ههرێما كوردستانێ و ل دویڤ شیانێن كو ههبووینه، حكوومهتێ ههول دایه گرنگیێ بدهته ڤێ هونهرا مهزن و پشتگیریا كارێن سینهمایى بكهت، چ وهكى چێكرنا فیلمێن سینهمایى، یان ژى سازكرنا چالاكى یێن سینهمایى یێن وهكى ڤێ ڤیستیڤالێ.
ئهم دزانین د ڤى واریدا ل هەمی كوردستانێ ههولێن پێشخستنا سینهمایێ ههبووینهو بهردهوام ژى ههنه، ڤێجا چ ژ لایێ دهزگههێن حكوومهتێڤه بیت، یان ژى ژ لایێ هونهرمهند و سینهماكارێن كوردستانێڤه بیت، لێ بهلێ ئهم دزانین ژى كو ئهڤ ههولهوهكى پێویستن نینه، نهژبهر كو ئهم وهكى مللهت و وهكى حكوومهت ژى، بها و گرنگییا ڤێ هونهرێ نزانین، نهخێر، لێ ژبهر گهلهك ئهگهرێن دى كو مخابن نه د دهستێ مهدا بوونە.
ئاشكرایهب درێژیا تهمهنێ حكوومهتا هەرێمێ، بهردهوام ڕهوشێن وسا ههبووینهكو چاڤێ مهیێ ل ئهولهویاتێن دى بووى. مخابن ب درێژیا ڤان سالا، بهردهوام ڕهوش و كاودانێن نههاریكار و ل دهرڤهى ئیرادا مه هاتینهڕێكا مهو، مەجالێ پشتگیریا سینەمایێ ل كوردستانێ وەكی پێویست نەبوویە.
لێ بهلێ دگهل ڤێ چهندێ ژى، كێم ـ زێدهو، ل دویڤ شیانێن كو ههبووینه،حكوومهتێ پشتگیریا سینهمایێ و بهرههمێن سینهمایى یێن كوردستانێ كریهو ههول دایه كو د ڤى واریدا خزمهتهكێ بكهت. بۆ ڤێ یهكێ ژى گهلهك هونهرمهند و سینهماكارێن كوردستانێ شاهدن.
ههروسا فیلم و بهرههمێن سینهمایى یێن هژمارهكا وان سینهماكاران ژى، كو بهشداریا چهندین ڤیستیڤالێن جیهانى كرینه و چهندین خهلاتێن بهرچاڤ ژى بدهستڤه ئیناینه، شاهد و بهلگهیێن ڤێ پشتگیریا حكوومهتا ههرێما كوردستانێنه. ههلبهت، پشتگیریا كو هاتیهكرن و بهرههمێن كو هاتینهچێكرن ژى، نهل دویڤ تمووحا مهنهو ئهم دزانین بۆ كارێن باشتر و سهركهفتیتر، هاریكارى و پشتگیرى یێن مهزنتر پێویستن ژبۆ بوارێ سینەمایێ ل هەرێما كوردستانێ.
زێدهڕۆیى نیه ئهگهر بێژین سینهما هونهرا ههرى كاریگهرا جیهانێ یه. كاریگهریا كو سینهمایێ كریه و دكهت، ژ كاریگهریا ههموو هونهرێن دى زێدهتره. ڕۆلا كو سینهما دبینیت، ژ ڕۆلا ههمى هونهرێن دى مهزنتره. ب درێژیا دیرۆكا خۆ، هیچ هونهرهك هندى سینهمایێ، نهبوویه دهربڕا ڕاستهقینهیا ژیانێ. دهربڕا ڕاستهقینهیا خهم و دهرد و ژانێن مرۆڤاتیێ. دهربڕا خهون و خۆزى و، هیڤى و ئومێدێن مرۆڤان.. پهردێ سینهمایێ ڕۆنترین ئاوێنهیا ژیامللەتەكێ یە.
سینهمایێ گهلهك ڕووداو و سهرپێهاتى یێن جیهانێ و جڤاكا مرۆڤاتیێ، دهق و دهق وهكى خۆ ڤهگوهاستینه و دوكیوومێنت كرینه. زولم و زۆر و دهردهسهرى یێن گهلهك مللهتان تۆمار كرینه و دهنگێ گهلهك بێدهنگكرییان، گههاندیهجیهانێ. دیرۆك و سهرهاتى یێن گهل و وهلاتێ مه، ماددهیێن ههرى باش و بهاگرانن بۆ هونەرا سینەمایی. ئهگهر وهكى گهلهك مللهتێن جیهانێ، شانسێ گهلێ كوردستانێ ژى ههبا و ڕهوشا وى هاریكار با، نهۆ ب سهدان و ب هزاران سهرهاتى و چیرۆكێن مه، دا بنه بابهتێن سهدان شاكارێن سینهمایى ل سەرتاسەرێ جیهانێ.
ههر ژ سهرهلدان و شۆڕهشێن كهڤنێن كوردستانێ بگره، ههتا دگههیته ئۆپهراسیۆنێن ڕهشێن ئهنفالا، داستان و قههرهمانى یێن پێشمهرگا، كۆچبهرى و ئاوارهبوونێ، چیرۆكێن ئهڤین و حهزكرنێ، ههتا دگههیتهئهڤرۆ و فهرمانا كو هاتیهسهرێ كهسوكارێن مهیێن ئێزدى. چیرۆكا ب ئێش و ژانا ههر خوشكهكا مهیا ئێزدى كو هاتیهڕهڤاندن، سهرپێهاتیا ئالانێ جوانهمهرگ، ئهڤانه و ب هزارا چیرۆكێن دى ژى، بابهتێن گهلهك شاكارێن سینهمایى یێن مهزنن.
چیرۆكا ئالانێ سێ سالى، كو وهكى فریشتهكێ نڤستى ل سهر لێڤا دهریایهكا بێ ڕهحم ڕازا بوو. دیمهنهك بوو كو چ جارا ژبیرا مهناچیت. دیمهنهك بوو كو د لهحزهیهكێدا ههمى ئهو زولم و ستهم و كارهساتێن هاتینه سهرێ گهلێ كوردستانێ و مرۆڤاتیێ، ئینانهبیرا مه. دیمهنهك بوو كو دبێژتهمه، شهڕ تشتهكێ چهندێ نەخۆشە و، جیهانێ و مرۆڤاهیێ، چهند پێویستیا ب ئاشتیێ ههى؟!. بێگومان بتنێ كامێرا و چاڤێ سینهمایێ دێ شێت ڤان ههمى دهربڕینا، د دیمهنهكێ وهك یێ ئالانێ جوامهرگدا نیشا جیهانێ بدهت.
ئامادهبوویێن بەڕێز..
بهردهوامیا ڤێ ڤیستیڤالێ ل دهۆكێ د ڕهوشا ئهڤرۆیا كوردستانێدا كو گهلهك كێشهو قهیرانێن سیاسى، ئابوورى و دارایى ههنه و، شهڕهكێ گران ب سهر گهل و وهلاتێ مهدا هاتیهسهپاندن، جهێ خۆشحالییهكا مهزنه. ههروسا نیشان و بهلگهیهكا دیارهكو گهلێ كوردستانێ، گهلهكێ زندییه و دگهل ههمى زهحمهتیا ژى، دهستێ وى ژ پێشكهفتنێ و، ژ عهشقا وى یا بۆ ژیانێ بهرنابن و دێ هەر بەردەوام بیت.
هیڤیا سهركهفتنێ بۆ سێیهمین ڤیستیڤالا ناڤنهتهوهیى یا فیلمان ل دهۆكێ دخوازم، دهستخۆشیێ ل ههوهدكهم، هیڤیدارم كو ڕهوش و كاودانێن باشتر بێنهپێش و ئهم ژى چ وهك حكوومهتا ههرێما كوردستانێ، چ ژى كهرتێ تایبهت بشێین باشتر گرنگییەكا زێدەتر ب بوارێ سینەمایێ ل هەرێما كوردستانێ بدەین.
دیسا جهێ خۆیە ئەز دەستخۆشییەكا تایبەت ل ڕێڤەبەریا ڕەوشەنبیری یا دهۆكێ كاك ئەیوب و هەڤالێت وی بكەم بۆ ڤێ ڕێوڕەسمێ و هەروەها سوپاسیا پشتگیری یا پارێزگارێ دهۆكێ بكەین بۆ ڤێ ڤیستیڤالێ و سوپاسیا جەنابێ وەزیرێ ڕەوشەنبیری بكەین كو پشتیڤان و هاریكار بوویە.
دیسا ئەز جارەكا دی بخێرهاتنا وە هەمیا دكەم و هیڤیا سەركەفتنێ بۆ ڤیستیڤالا وە دخوازم.
بخێربێن سەرچاڤا و سەر سەرا، زۆر سوپاس.
