سەقەر ئەبو فەخر توێژەر له سەنتەری عەرەبی بۆ دیراساتی سیاسی له بەیروت بۆ گوتى: ئەم ناوچەی ئێوە لە ئێستادا لە هەموو لایەكەوە گڕی ئاگری لێ هەڵدەستێ و بەر لە هەموو شتێك پێویستە بە دوای سەرچاوەی ئاگرەكە بگەڕێین، تا تەشەنەی نەكردووە، بیكوژێنینەوە، بۆ ئەوەی مەترسیی زیاتری بەدوادا نەیەت، دواتر بەدوای چارەسەردا بچین. ئەمە رێك وەك ئەو كەسە وایە كە پێیەكانی لە تەڵەیەك دەئاڵێت و پێش هەموو شتێك دەبێ هەوڵبدات پێیەكانی لە تەڵەكە دەربێنێت، ئینجا رێگایەك بگرێتە بەر كە مەبەستیەتی، یانیش وەك یەكێكە خەریكە لەنێو دەریادا دەخنكێت، بە دوای شتێكدا دەگەڕێت تا نەخنكاوە خۆی پێ رزگار بكات، ئەم ناوچەیە كە لە ئێستادا گڕی گرتووە، بەر لە 30 ساڵ ناوچەیەك بوو بەرەو پەرەسەندن و گەشانەوە هەنگاوی هەڵگرتبوو، بەرەو بنیادنان و چەسپاندنی دیموكراسی و ژیانێك كە مافی گەلانی تێدا دەستەبەر بێت، گەلانی ئەم ناوچەیە بۆ ئایندەیەكی گەش خەباتیان دەكرد، عەرەب بۆ رزگاركردنی فەلەستین لەیەك سەنگەردا بوون، تەنانەت گەلانی دیكەش رووباری خوێنیان دەڕشت لە پێناو ئازادی و دادپەروەریی كۆمەڵایەتی و ژیانێكی بەختەوەر، بەڵام لە ئێستادا هەروەك گوتم، ناوچەكە دووچاری گڕی كێشە و قەیرانەكان بۆتەوە، بۆیە من پێموایە زۆر ئەستەمە هەر وا بە ئاسانی بیر لە چارەسەری ئەو هەموو كێشانە بكرێتەوە.



سەقەر ئەبو فەخر هەروەها گوتی: قۆناغی هەڵوەشاندن و پارچەپارچەبوونداین، قۆناغی هەرەسهێنان لە ساڵی 2003 بەدواوە بوو، كاتێ لە زۆر ناوچەكانی عێراق و ئێران و وڵاتانی دیكەی عەرەبی ئەمە رووی دا، بەڵام لە ئێستادا لە قۆناغی پەرتەوازەبوون و هەڵوەشانەوەداین، بەڵام هیچ شتێك لە ئاسۆدا نییە مایەی ئەوە بێت كە رەنگە چارەسەرێك بۆ هەموو ئەو قەیران و شەڕانەی ناوخۆ و ئیقلیمی هەبێت، بەهەرحاڵ رەنگە هەندێ هێزی ئاشتیخواز هەبن كە هەوڵی ئەوە بدەن تا رادەیەك ئەگەر پێیان بكرێت لە مەینەتییەكانی ئەم تەنگژە و تێكچڕژانە سەختانە كەم بكەنەوە، بەڵام بڕوا ناكەم ئەو دەرفەتەیان بۆ بڕەخسێت.

شايانى باسه فەخر هەروەها گوتی: ئێمە چەند ساڵێك لە ژێردەستی ئەو دەوڵەتانەی ئەوروپادا بووین، بەڵام ئەوان ئێستا لە عەرەبەكانی دەوروبەرمان بە بەزەییترن و داڵدەی كۆچبەران دەدەن، ئەو دەوڵەتە عەرەبییانە خۆیان هۆكاری ئەو هەموو قەیران و كێشانەن، ئەوان خۆیان هاریكاری و پشتگیریی ئەو توندوتیژی و شەڕانەی ناوچەكە دەكەن، لەوانە سعودیە، قەتەر و دەوڵەتانی دیكەی ناوچەكە، ئەو عەرەبانە ترسیان لەوەیە كە ئەو كۆچبەرانەی لە عێراق و سووریا و شوێنەكانی دیكەوە روویان تێدەكەن كە رۆشنبیرن و زیاتر هەستیان بە مەینەتی و كارەسات كردووە، نەبادا رۆژێك لە رۆژان كەلتووری گۆڕینی رژێمەكانیان بڵاوبكەنەوە، ئەوروپییەكان بە بەزەییترن بۆ داڵدەدان و حەواندنەوەی كۆچبەران.

ئەبو فەخر لە كۆتایی قسەكانیدا دەڵێ: ئەم ئاگركەوتنەوەیەی رۆژهەڵاتی ناوەڕاست هۆكاری زۆری لە پشتەوەیە، نەك تەنیا یەك هۆكار، بگرە هەندێ هۆكاری ناوخۆییش هەیە، لەوانە كە پێوەندییان هەیە بە شێوازی رژێمی حوكم و داخوازیی گەلەكانیان بۆ ئازادی و مافی مرۆڤ و نەهێشتنی گەندەڵی، بۆیە ئەو خۆپیشاندان و ناڕەزاییانەی لە تونس و میسر و لیبیا سەریان هەڵدا و ئەوەی كە لە ئێستادا عێراقی گرتۆتەوە، هەموویان ناڕەزایین دژی بوونی گەندەڵی و نادادپەروەری و دزین و بە هەدەربردنی سامانی ئەو وڵاتانە لەلایەن دەسەڵاتدارانەوە، هەروەها بوونی هەژاری و سەركوتكردن لە وڵاتانەدا، ئەمانە بوونە هۆی سەرهەڵدانی شەپۆلی ناڕەزایی و خۆپیشاندان كە لە راستیدا رەوایە، بەڵام لەمەشدا دەستێوەردانی دەرەكی هاتەناوەوە و بەلایەكی دیكەیاندا برد، لە ئێستادا ئیسلامی سیاسی تەنیا پەڕگیر و تیرۆریستان بەرهەم دێنێت.


بۆ خوێندنەوەی ئەم بابەتە لە گۆڤاری گوڵان ژمارە(1041)