ئاسایشی کەرکووک دەستگیركردنی 90 كەسی لەماوەی 40 رۆژدا بە چەندین تۆمەتی جیاواز راگەیاند.

فەرهاد حەمە عەلی، گوتەبێژی ئاسایشی کەرکووک بە (تۆڕی میدیایی رووداو)ی راگەیاند ''بە هاوکاری هاووڵاتیان و دەزگا ئەمنییەکانی کەرکووک، ژمارەیەکی زۆر لە داواکراو و چەکداری داعش و قاچاخاچی لەنێوان کەرکووک و سنوورەکانی داعش کە ئەوان خەڵکیان لەو ناوچانەوە بۆ دەهێنا بۆ کەرکووک دەستگیرکراون''.

فەرهاد حەمە عەلی، ئامارێکی رادەستی تۆڕی میدیایی رووداو کرد کە تایبەتە بە ژمارەی ئەو کەسانەی ئاسایشی کەرکووک لە 1/7/2015ەوە تاوەكو 1/8/2015 دەستگیریکردوون و تێیدا هاتووە'' پێنج کەس بە ماددەی 4ی تیرۆر، 2 چەکداری داعش و 48 داواکراو له‌لایه‌ن دادگا و ده‌زگا ئه‌منییه‌كانه‌وه، لەگەڵ 6 گومانلێکراوی دیکە و 4 تاوانبار بە ماددەی 406، هەروەها 6 زیندانی هەڵهاتوو لە زیندانەکانی موسڵ و تکریت دەستگیركراون''.

لەنێو ئامارەکەدا ژمارەیەک کەس بەتۆمەتی قاچاخچێتی دەستگیرکراون، هەندێکیان خەڵکیان بە قاچاخ بردووەتەوە نێو کەرکووک و ژمارەیەکی دیکە خۆیان دزەیان کردووەتە نێو شارەکەوە، لە ئامارەکەدا هاتووە ''5 قاچاخچی كه خه‌ڵكیان له ناوچه‌كانی ژێر ده‌سه‌ڵاتی داعشه‌وه ده‌هێنا بو سنووری كه‌ركووك، لەگەڵ 8 کەسی دیکە کە به قاچاخ له‌سنووری ژێر ده‌سه‌ڵاتی داعشه‌وه هاتبوونه كه‌ركووك دەستگیركراون''.

لە نێو ئەوانەشدا ''6 کەس بەتۆمەتی دزی و بە ماددەی 446 دەستگیرکراون، کەسێکی دیكەش كە مامەڵەی ساختەی بە دراوەوە کردووە و کەسێکی دیکەش هاووڵاتیانی لە خشتە بردووە و فێڵی لێیان کردووە''.








رووداو