بە بەراورد لەگەڵ عێراق، زۆرترین ئاوارەی سوریا روویان لە ھەرێم کردوە
لە کۆنگرەیەکی رۆژنامەوانیدا، یاریدەدەری بەرپرسی فەرمانگەی پەیوەندییەکانی دەرەوەی ھەرێمی کوردستان، دیندار زێباری رایگەیاند، لە ئێستادا تێکڕای ژمارەی پەنابەرانی سوریا لە عێراق گەیشتۆتە ١٠٦ ھەزار و ٨٢٧ پەنابەر، لە کۆی ئەو ژمارەیەش ٩٩ ھەزار و ١٣٨ پەنابەر لە ھەرێمی کوردستان نیشتەجێن.
لە بارەی چۆنیەتی دابەشبوونی پەنابەران لەھەر سێ شارەکانی دھۆک، ھەولێر و سلێمانی زێباری روونیکردەوە و گووتی: لە دھۆک ٧٠ ھەزار و ٦٦٣ پەنابەر، ھەولێر ٢١ ھەزار و لە سلێمانی ٧ ھەزار و ٧٩ پەنابەر نیشتەجێبوون.
ھەروەھا ئاماژەشیدا، رۆژانە نزیکەی ٩٠٠ پەنابەر دەگەنە ناو خاکی ھەرێمی کوردستان، ئەمەش وایکردووە کەمپەکە قەرەباڵغی زۆری تێ بکەوێت و ببێتە ھۆکار بۆ ھاتەکایەی پشێوی و ئاڵۆزی لەنێوان پەنابەرانی ناو کەمپ.
ئەوەشی روونکردەوە کە بەشی زۆری پەنابەرانی روویان لە ھەرێم کردوە، خەڵکی شاری حەسەکە و کوردەکانی خەڵکی قامیشلۆن.
گووتیشی:جگە لەوەی بەشێکی دیکەی پەنابەران خەڵکی شارەکانی دیمەشق و ئەلیپۆنن.
لە بارەی پێداویستییە خزمەتگوزارییەکانی ناو کەمپی دومیز، دیندار زێباری گووتی: لەگەڵ زۆربوونی ژمارەی پەنابەران کۆمیسیۆنی باڵای پەنابەران بەھاوکاری رێکخراوەکانی دیکەی پەنابەران و بەڕێوەبەرایەتی کۆچ و کۆچبەران ھەستاوە بە دابین کردنی پێداویتسیەکانی وەک گەیاندنی تۆڕی ئاو و کارەبا دابین کردنی شوێنی حەوانەوە.
سەبارەت بەو ھاوکاری کۆمەکییە مرۆییانەی بۆ یارمەتیدانی پەنابەران کۆکراوەتەوە، روونیکردەوە:تا ئەم مانگە \"ئازار / مارس\"" کۆمەک و ھاوکارییە کۆکراوەکان بەھاکەی بە ٥٠٠ ھەزار دۆلاری ئەمەریکایی دەخەمڵێنرێت، ئەمەش بەھاوکارییەکی کاریگەر ئەژماردەکرێت بۆ پەنابەران لە عێراق و ھەرێمی کوردستان."
