9ی‌ ئازار/ مارس 2013 (گوڵان میدیا)- رۆژی یەكشەممەی رابردوو لە میانەی سەردانەكەیدا بۆ دەڤەری گەرمیان و بەسەركردنەوەی شاری هەڵەبجەو سەیدسادق و پێنجوێن و چوارتا، بەڕێز نێچیرڤان بارزانی بەردی بناغەی زیاتر لە 80 پڕۆژەی خزمەتگوزاری داناو لەنزیكەوە گوێبیستی خواست و داواكاری بەرپرسانی ئیداری ئەو ناوچانەبوو بۆ ئەوەی خزمەتگوزاری زیاتر پێشكەشی هاوڵاتیانی ئەو دەڤەرە بكرێت. كەچی لە هەندی دەزگا وا بڵاوكرایەوە كە گوایە سەرۆكی ئەنجومەنی وەزیران بەنهێنی و بە شەو سەردانی چوارتای كردووە تا هاوڵاتیان نەبینێت.

لەم بارەیەوە سەفین محسن دزەیی ووتەبێژی فەرمی حكومەتی هەرێم كە یاوەری سەرۆك وەزیران بوو لەم سەردانەدا رایگەیاند: بە داخەوە ئەم هەواڵە بەم شێوەیە نییە كە هەندێ‌ كەناڵ بڵاویان كردەوە، سەرۆك وەزیران نێچیرڤان بارزانی بە یاوەری چەندین وەزیر و بەرپرسانی حكومەتی سەردانی ئەو ناوچانەی كردو بەردی بناغەی زیاتر لە 80 پڕۆژەی خزمەتگوزاری لە هەموو بوارەكان بۆ ئەو دەڤەرە دانا. لە بەسەركردنەوەكەیدا بەڕێز سەرۆكی حكومەت لە نزیكەوە لەگەڵ بەرپرسانی ئیداری نوێنەرانی خەڵكی هەڵەبجەو پێنجوێن و سەیدسادق دانیشت و ئەوانیش بە تێروتەسەلی باسیان لە رەوشی ناوچەكەیان و پێداویستی و داواكاری هاوڵاتیان كرد.

دزەیی گووتی: بەهۆی بەرفراوانی ناوچەكە سەردانەكە كاتی زۆری خایاند، لەگەڵ ئەوەشدا سەعات 7:00 ئێوارە سەرۆك وەزیران نێچیرڤان بارزانی سەردانی چوارتای كردو هاوشێوەی ناوچەكانی تر لەگەڵ بەرپرسانی ئیداری چوارتا كۆبووەو ئەوانیش كۆمەڵێ‌ داخوازی و پیداویستی هاوڵاتیانیان خستە بەردەم سەرۆكی حكومەت.