29ی‌ كانوونی‌ دووه‌م/ یه‌نایه‌ر (گوڵان میدیا)- مەسعود بارزانی، سەرۆكی كوردستان، لە پەیامێكدا كە كەمێك بەر لە ئێستا لە لاپەڕەی تایبەتی خۆی لە تۆڕی كۆمەڵایەتی فەیسبووك بڵاوی كردەوە، هاوخەمی خۆی بۆ زیانلێكەوتووانی لافاوی ئەم دواییەی چەند ناوچەیەكی كوردستان دەربڕی. ئەمەی خوارەوە دەپی پەیامەكەیە:

دوای ئەوەی لە ماوەی چەند ڕۆژی ڕابردوودا شەپۆڵێكی بارانبارین و سەرما كوردستانی گرتەوە بە داخەوە ژمارەیەكی زۆری هاووڵاتیان لە ئەنجامی بارانی زۆر و لافاوەوە تووشی زەرەر و زیانی گیانی و ماددی هاتوونە. وێڕای دەربڕینی هاوخەمی و پاڵپشتیم بۆ ئەو ئازیزانە سەرەخۆشی لە كەسوكاری قوربانییانی ئەو ڕووداوانە دەكەم. داوا لە سەرجەم دامودەستگە پێوەندیدارەكانی حكوومەتی هەرێم دەكەم بە هەموو توانایەكیانەوە یارمەتیی زیانلێكەوتوان بدەن و بەدەم داواكارییەكانیانەوە بچن.

ئاگاداری بارودۆخی خوشك و برایانی ڕۆژئاوای كوردستانیشم لە كەمپەكاندا. هەست بە ئێش و ئازارەكانیان دەكەم. داواكارم لە حكوومەت و ڕێكخراوە ناحكوومییەكان و هاووڵاتیانی كوردستان كە لەو ساتە سەختانەدا زیاتر بە هانایانەوە بچن. ئەوان كەسوكاری ئێمەن و ئێش و ژان و چارەنووسمان هاوبەشە.