23ی‌ كانوونی‌ دووه‌م/ یه‌نایه‌ر (گوڵان میدیا)- به‌ڕێز مسعود بارزانی سه‌رۆكی هه‌رێمی كوردستان دوێنێ سێشه‌ممه‌ 22/1/2013 هاوڕێ‌ له‌گه‌ڵ ئه‌و شانده‌ی یاوه‌ریی جه‌نابیان ده‌كه‌ن گه‌یشته‌ سویسرا. له‌ میانه‌ی سه‌ردانه‌كه‌یدا بۆ سویسراو به‌ مه‌به‌ستی به‌شداریكردن له‌ كۆربه‌ندی ئابووری جیهانی كه‌ له‌ داڤۆس ده‌به‌سترێ‌، ئه‌مرۆ چاوی به‌ به‌ڕێز رێكس پیله‌رسۆن سه‌رۆكی ئه‌نجوومه‌نی راپه‌ڕاندنی كۆمپانیای ئیكسۆن مۆبیل كه‌وت. له‌ دیدارێكدا سه‌رۆكی ئه‌نجوومه‌نی راپه‌ڕاندنی كۆمپانیای ئیكسۆن مۆبیل باسی له‌ چالاكییه‌كانی كۆمپای ئیكسۆن مۆبیل كرد، كه‌ ماوه‌یه‌كه‌ له‌ هه‌رێمی كوردستان كاری دۆزینه‌وه‌ و ده‌رهێنانی نه‌وت ده‌كات.

ئه‌مه‌ و به‌ر له‌وه‌ی سه‌رۆك بارزانی به‌ره‌و سویسرا به‌ڕێ‌ بكه‌وێ‌، سه‌ردانی ئه‌ڵمانیای كرد به‌ مه‌به‌ستی ئه‌حواڵپرسین سه‌باره‌ت به‌ ره‌وشی ته‌ندروستی فه‌خامه‌تی سه‌رۆك كۆمار جه‌لال تاڵه‌بانی و ئاگاداربوون له‌و رێوشوێنه‌ پزیشكیانه‌ی گیراونه‌ته‌ به‌ر بۆ چاره‌سه‌ركردنی سه‌رۆك كۆمار، سه‌رۆك بارزانی زۆر خۆشحاڵ بوو به‌ باشتربوونی ره‌وشی ته‌ندروستی فه‌خامه‌تی سه‌رۆك تاڵه‌بانی و ئه‌و چاره‌سه‌ركردن و رێوشوێنه‌ پزیشكیانه‌ی بۆیان دانراوه‌.