16ی‌ كانوونی‌ دووه‌م/ یه‌نایه‌ر (گوڵان میدیا)- بەداخەوە ئەمرۆ رێکەوتی ١٦/١/٢٠١٣، ژمارەیەک لە کارمەندانی ئاسایش و پۆلیس و هاوڵاتیانی پارێزگای کەرکوک بە دەستی ڕەشی تیرۆر خەڵتانی خوێن کران. ئێمە لە کاتێکدا ئەم کردارە بە توندی ریسوا دەکەین، بۆ گشت لایەکی ڕادەگەیەنین کە هێزەکانی ئاسایشمان بە گووڕتر لە جاران لە ئەرکی پاراستنی ئاسایشی پارێزگای کەرکوک بەردەوام دەبن و ئەمجۆرە کردارانە کار ناکاتە سەر ورە و خۆراگریی هێزەکانمان.
هێزەکانی ئاسایش و پۆلیس لە کەرکوک هەمیشە لە ریزی پێشەوەی بەرەنگاربوونەوەی تیرۆریستان بوونە و بەردەوام لە پێناو پاراستنی گیان و ماڵی هاوڵاتیان گیانیان بەخت کردووە و لەمەولاش لەو ئەرکە پیرۆزەیان بەردەوام دەبن و لە قەڵاچۆکردنی رەگ و ریشەی تیرۆریستان سڵ ناکەنەوە.
پرسە و سەرەخۆشیمان ئاراستەی بنەماڵەی شەهیدانی ئاسایش و پۆلیس و هاولاتیانی خۆشەویستی کەرکوک دەکەین و جێگەیان بەهەشتی بەرینە و هیوای هەرچی زووتر چاکبوونەوەش بۆ بریندارانی ئەم کردارانە دەخوازین.
هاوڵاتیانی خۆشەویستمان لە کەرکوک و گشت ناوچە کوردستانییەکانی دەرەوەی سنووری ئیدارەی هەرێم دڵنیا دەکەینەوە کە بە پلانی پتەوتر و کاریگەرتر و بە هەموو توانایەکمان لە هەوڵەکانمان بۆ سەقامگیریی رەوشی ئاسایشی ئەم ناوچانە بەردەوام دەبین .

ئەنجوومەنی ئاسایشی هەرێمی کوردستان
١٦/١/٢٠١٣