15ی‌ كانوونی‌ دووه‌م/ یه‌نایه‌ر (گوڵان میدیا)- له‌كۆبوونه‌وه‌كه‌دا سه‌ره‌تا د.ئه‌رسه‌لان بایز سه‌رۆكی په‌رله‌مانی كوردستان به‌رنامه‌ی كاری كۆبوونه‌وه‌كه‌ی له‌دوو ته‌وه‌ر دیاریكرد. ته‌وه‌ری یه‌كه‌میان بۆ دیاریكردنی وه‌ڵامی په‌رله‌می كوردستان بوو بۆ ئه‌و پرۆژه‌یه‌ی بزووتنه‌وه‌ی گۆران وه‌ك كارنامه‌یه‌ك بۆ چاكسازی له‌هه‌رێمی كوردستان له‌سه‌ر هه‌موو ئاسته‌كان پێشكه‌شی سه‌رۆكایه‌تی هه‌رێمی كردووه‌و له‌لایه‌ن سه‌رۆكی هه‌رێمیشه‌وه‌ ئاراسته‌ی په‌رله‌مان و حكومه‌ت كراوه‌ بۆ كارله‌سه‌ركردنی . ته‌وه‌ری دووه‌میشیان دیاریكردنی ئالیه‌تێك بوو بۆ گفتوگۆكردنی بودجه‌ له‌لایه‌ن فراكسیۆن و په‌رله‌مانتارانه‌وه‌ بۆئه‌وه‌ی له‌كاتی گفتوگۆكردنی پرۆژه‌ یاساكه‌دا ره‌چاوی كات بكرێت به‌شێوه‌یه‌ك بیروراو سه‌رنجه‌كان دووباره‌ نه‌بنه‌وه‌و هه‌رپه‌رله‌مانتاره‌و له‌كاتێكی دیاركراوو گونجاودا راوسه‌رنجه‌كانی بخاته‌روو.

سه‌باره‌ت به‌خاڵی یه‌كه‌م دوای وه‌رگرتنی سه‌رنج و تێبینی سه‌رۆكی سه‌رجه‌م فراكسیۆنه‌كان بریاردرا هه‌فته‌ی داهاتوو كۆبوونه‌وه‌یكی تر ئه‌نجام بدرێت و له‌و ماوه‌یه‌شدا سه‌رجه‌م فراكسیۆنه‌كان بیرورای خۆیان له‌سه‌ور پرۆژه‌كه‌ گه‌لاله‌ بكه‌ن بۆ ئه‌وه‌ی سه‌رۆكایه‌تی په‌رله‌مان، سه‌رۆكایه‌تی هه‌رێم له‌رای كۆتایی په‌رله‌مان سه‌باره‌ت به‌ پرۆژه‌كه‌ ئاگاداربكاته‌وه‌.

سه‌باره‌ت به‌ گفتوگۆكردنی بودجه‌ش بریادرا له‌ماوه‌ی یاسایی خۆی كه‌ یه‌ك مانگه‌ تێپه‌ر نه‌كات گفتوگۆكردنی بودجه‌ ده‌ستی پێ بكرێت و هه‌روه‌ك میكانیزمی گونجاویش بۆ گفتوگۆكردنی بودجه‌ دیاریكراو له‌مباره‌یه‌وه‌ هه‌موولا كۆكبوون كه‌ كاتێكی گونجاو دیاری بكرێت بۆ هه‌ر په‌رله‌مانتارێك تا سه‌رنجه‌كانی خۆی له‌سه‌ر برگه‌و مادده‌كانی پرۆژه‌ی بوودجه‌ بخاته‌روو به‌شێوه‌یه‌ك كه‌دووباره‌بوونه‌وه‌ی تێدا نه‌بێت، ئه‌ویش له‌پێناوی سود وه‌رگرتن له‌كات بۆئه‌وه‌ی بودجه‌ی هه‌رێم له‌لایه‌ن په‌رله‌مانی كوردستان له‌ماوه‌یه‌كی دیاریكراو ده‌وله‌مه‌ندو په‌سه‌ند بكرێت و له‌كۆتایشدا به‌شێوه‌یه‌ك دابرێژرێته‌وه‌ كه‌ سه‌رجه‌م هاولاتیانی كوردستان لێی سودمه‌ند بن.