بە ناوی خوای مەزن و دڵۆڤان

لە یادی كۆچی پڕشكۆی پێغەمبەر و شەفیعی مەزنمان محەمەد ولمستەفا (د.خ) و هاتنەوەی ساڵی 1434ی نوێی كۆچییەوە ، گەرمترین پیرۆزبایی ئاراستەی هەموو خوشك و برایانی موسڵمانی كوردستان و سەرجەم موسڵمانانی عیراق و جیهان دەكەم.

هیوا خوازم ساڵی نوێی كۆچی ، ساڵی پڕ خێروبەرەكەت و ساڵی سەرفرازی گەلی كوردستان و هێنانەدی عیراقێكی دیموكرات و فیدراڵی بێت كە تێیدا گشت گەلانی عیراق بە مافە رەواكانی خۆیان شاد بن .

هەڵبەتە لەم هەلومەرجە ناسك و دژوارەدا پێویستیمان بە یەكڕیزی و هاوهەڵوێستی هەیە لە بەرگریكردن لە دەستكەوت و مافەكانمان ، بۆیە ئەمرۆ بە هەق رۆژی یەكبوون و یەكخستنی ئیرادەی گەلەكەمانە بە گشت نەتەوە و تایفە ئایینیەكانیەوە .

ئەم یادە پیرۆزە پەیامێكە بۆ رەدكردنەوەی زوڵم و ستەم و مەغزایەكی زۆر گەورەی هەیە كە ئێمە وەكو گەلی كوردستان و عیراق دەبێ‌ پەندی لێ وەربگرین و بەرامبەر بە خاك و نیشتمانی خۆمان وەفادار بین و بە هەموو هێز و توانایەكیشمانەوە هەوڵی جدی بۆ هێنانەدی ئەو ئامانجە نەتەوەییانە بدەین كە شەهیدە سەربەرزەكانمان لە پێناویاندا شەهید بوون .

جارێكی دیكە ئەم یادە پڕشكۆیە لە هەموو موسڵمانان پیرۆز دەكەم و گەلی كوردستان و عیراقیش هەمیشە سەرفراز و ئازاد بن .


مسعود بارزانی
سەرۆكی هەرێمی كوردستان
29ی ژی الحجە 1433
14ی تشرینی دووەمی 2012