12ی تشرینی دووه‌م/نۆڤمه‌به‌ر(گوڵان میدیا)- له‌گه‌ڵ هاتنى وه‌رزى سه‌رما و بارانبارین ته‌واونه‌بوونى پرۆژه‌ى رێگاى دێلزیان ئاسته‌نگێكى گه‌وره‌ى له‌ بواری هاتووچۆ بۆ هاووڵاتیانى سنووری قه‌زاى سۆران دروست كردووه‌ به‌ تایبه‌تى بۆ چینى قوتابیان كه‌ رۆژانه‌ ناچارن به‌م رێگایه‌ هاتووچۆ بكه‌ن. له‌مباره‌یه‌وه‌ قوتابیه‌ك رایگه‌یاند: ئه‌م رێگایه‌ ژیانى لێ تاڵ كردووین به‌تایبه‌تى له‌گه‌ڵ هاتنى وه‌رزى سه‌رما و بارانبارین و ئێمه‌ رۆژانه‌ له‌ وانه‌كانمان له‌ زانكۆ دوا ده‌كه‌وین یان ئه‌گه‌ر باران بێت ئه‌وا هاتووچۆكردن هه‌ر زۆر زه‌حمه‌ت ده‌بێت.

هه‌روه‌ها گوتی: چه‌ندین جار له‌لایه‌ن لایه‌نه‌ په‌یوه‌نداره‌كانه‌وه‌ به‌ڵێنمان پێدراوه‌ كه‌ په‌له‌ له‌ ته‌واوبوونى پرۆژه‌كه‌ بكرێت به‌ڵام ئه‌وا وه‌رزى زستان هات و پرۆژه‌كه‌ش هه‌روه‌ك خۆی ماوه‌ته‌وه‌ بۆیه‌ داواكارم له‌ حكومه‌ت خه‌مێكى جیددیى له‌ته‌واوكردنی پرۆژه‌كان بخۆن.

لای خۆیه‌وه‌ رابه‌ر ساڵح به‌رِێوه‌به‌ری شارۆچكه‌ى دیانا گوتى : كاركردن له‌ پرۆژه‌ى رێگاى دێلزیان به‌رده‌وامه‌، به‌ڵام پێشتر كه‌شفى (700) مه‌تر دیواری پاڵپشت بۆ پرۆژه‌كه‌ كرابوو كه‌چى دواتر له‌به‌ر فراوانى پرۆژه‌كه‌ بوو به‌ (2000) مه‌تر، ئه‌مه‌ش كاتى زیاترى ده‌وێت و به‌ڵێنده‌ریش به‌رده‌وامه‌ له‌كاره‌كه‌ى.