4 ئەیلوول/سێپتێمبەر (گوڵان میدیا)- وه‌زاره‌تی كاره‌با هاوبه‌شانی له‌ سنووری پارێزگای هه‌ولێر ئاگادار ده‌كاته‌وه‌ كه‌ له‌ رێكه‌وتی 6/9/2012 له‌ كاتژمێر (5 تا 8)ـی به‌یانی تیمه‌كانی چاكسازیی هێڵه‌كانی سه‌ر به‌ وه‌زاره‌ت ده‌ست ده‌كه‌ن به‌ گواستنه‌وه‌ی وێستگه‌ی مۆبایلی هه‌ولێری نوێ له‌ سه‌ر هێڵی ژماره‌ یه‌كی 132 كه‌یڤی بۆ سه‌ر هێڵی ژماره‌ دووی 132 كه‌یڤی رۆژهه‌ڵات - باكووری هه‌ولێر. به‌م هۆیه‌شه‌وه‌ پێشبینی ده‌كرێت هاوبه‌شان له‌ قه‌زای سۆران و شارۆچكه‌ی پیرمام ماوه‌ی 3 تا 4 كاتژمێر بێ كاره‌با بن.
وه‌زاره‌تی كاره‌با رایده‌گه‌یه‌نێت كه‌ ئه‌م هه‌نگاوه‌ سوودی زۆری بۆ دانیشتوانی ئه‌و ناوچانه‌ هه‌یه‌ و ده‌بێته‌ هۆی ئه‌وه‌ی كه‌ بارزۆری سه‌ر هێڵ و وێستگه‌كانی كاره‌با كه‌متر بێته‌وه‌ و كاره‌باش به‌ شێوه‌یه‌كی رێكوپێكتر بگاته‌ ده‌ستیان جگه‌ له‌وه‌ی توانای گواستنه‌وه‌ی وزه‌ی كاره‌با 25 مێگاوات زیاد ده‌كات.
هه‌روه‌ها ئه‌م هه‌نگاوه‌ له‌ چوارچێوه‌ی ئاماده‌باشییه‌كانی وه‌زاره‌تدا دێت بۆ هاتنی وه‌رزی زستان كه‌ ئامانجێتی بارزۆری سه‌ر وێستگه‌ و هێڵه‌كانی كاره‌با له‌ سه‌رجه‌م ناوچه‌كانی هه‌رێم نه‌هێڵێت یان كه‌م بكاته‌وه‌.