كەمێك لەمەوبەر لە تەلاری پەرلەمان كوردستان یەكەمین كۆبوونەوەی تایبەت بەپێكهینانی ئەنجوومەنی باڵای دانوستاندنی هەرێمی كوردستان لەگەڵ ناوەند /حكوومەتی عێراق/ دەستی پێ كرد.
پێوەندییەكانی هەرێم و بەغدا زۆر جار رووبەڕووی رەخنە دەكرێتەوە بەوەی بەشێوەیەكی پیشەیی بەڕێوە ناچن و دیوەدەری تیادا نییە.

كۆبوونەوەكە بە ئامادەبوونی ڕۆژ نووری شاوێس جێگری سەرۆك وەزیرانی عێراق و ئەرسەلان بایز سەرۆكی پەرلەمانی كوردستان و محەمەد ئیحسان نوێنەری حكوومەتی هەرێم لە بەغدا و سەرۆكی فراكسیۆنەكانی كورد لە ئەنجوومەنی نوێنەرانی عێراق و پەرلەمانی كوردستان بەڕێوە دەچێ.

تارق جەوهەر راوێژكاری راگەیاندنی سەرۆكی پەرلەمانی كوردستان پێشتر رای گەیاندبوو، پێكهێنانی ئەنجوومەنەكە بۆ بەدواداچوون و بەڕێوەبردنی دانوستاندن لەسەر پرسە هەڵپەسێردراوەكانی نیوان هەرێم و بەغدا دەبێ.

رۆژی دووشەمەی رابردوو یەكەمین كۆبوونەوەی راوێژكاری فرەوان بۆ دامەزراندنی ئەنجوومەنی دانوستاندن لەگەڵ حكوومەتی بەغدا لەبارەی پرسە هەڵپەسێردراوەكانی نێوان هەرێم و بەغدا بەڕێوە چوو، بەشداران دامەزراندنی ئەنجوومەنەكەیان بە كارێكی گرنیگ و پێویست ناو برد بۆ ئەوەی وەك دامەزراوەیەكی نیشتمانی سەرپەرشتی كاری دانووستاندن و وتوێژەكانی نێوان حكوومەتی هەرێم و حكوومەتی بەغدا بكا.

هەرێمی كوردستان ماوەی زیاتر لە 6 ساڵە چەند پرسێكی هەڵپەسێردراوی لەگەڵ بەغدا هەیە لەوانە: نەوت و غاز، بودجەی پێشمەرگە، مادەی 140 و پرسی فیدراڵی.















ئاكانیوز