لێدوان و قسەکردن لەسەر ژیانی سیاسی و شۆڕشگێڕی و بڕوا بە خۆبوون و کوردایەتی و کوردبوونی ئیدریس بارزانی، بۆ بابەیکی وەک من کە تەنها چەند جارێک بە دیداری شاد بووم و لە ئامۆژگاری و رێنماییەکانی بەهرەمەند بووم کارێکی ئاسان نییە، بۆ ئەوانەش کە بەردەوام لێی نزیک بوون و لەگەڵی ژیاون کارێکی ئەستەمە، چونکە ژیانی ئیدریس بارزانی پڕ بووە لە نوێگەری شۆڕشگێڕی و خەبات و قوربانیدانی بەردەوام، ئەو نوێگەریەشی دەکردە وزەی بەردەوامی شۆڕش و وەڵامی قۆناغە سەختەکانی خەبات و بە ئومێدەوە روانین بۆ سەرکەوتن.
ئەوەی من لەو چەند جار بە خزمەت گەیشتنەی لێی فێر بووم و دەمەوێ لە یادی کۆچی دواییدا بیڵێم: ئیدریس بارزانی پێچەوانەی زۆرێک لە سیاسی و سەرکردەکانی ئێستا و رابردوو، سیاسەتی لە هەڵوێستی شۆڕشگێڕیدا وێنا دەکرد، هەڵوێستی شۆڕشگێڕیشی لە بڕوا بە خۆبووندا پێناسە دەکرد، بڕوا بە خۆبوونیشی لە ئاستی پێشکەوتنی هزر و بیری کوردایەتیدا چڕ دەکردەوە، هەموو ئەوانەش زادەی ئەو ژینگە سیاسی و شۆڕشگێڕی و نەتەوەییە بوون کە ئیدریس بارزانی تێیدا پەروەردە کرابوو، بۆیە کوچی دوایی نەک هەر بۆ پارتی خەسارەتێکی گەورە بوو، بەڵکو کەلێنێکی وای خستە ناو بزووتنەوەى رزگاریخوازی کورد کە پڕ کردنەوەى زەحمەتە.