بەرپرسێکى وەزارەتى بازرگانى هەرێمی کوردستان رایگەیاند بڕیارە حکوومەتى عێراق بۆ ئەمساڵ گۆڕانکارى لە بەشە خۆراکى مانگانەدا بکات، چەندین بژاردەش خراونەتە بەردەم ئەو لیژنەیەى بڕیار لەسەر گۆڕانکارییەکە دەدەن.

نەوزاد شێخ کامیل، بەڕێوەبەرى گشتیى بازرگانى لە وەزارەتى بازرگانى و پیشەسازى هەرێمی کوردستان راگەیاند: "حکوومەتى عێراق بەنیازبوو ساڵی ٢٠٢٠ گۆڕانکارى لە پسوولەى خۆراکى لە بەشە خۆراکى مانگانەى هاووڵاتیاندا بکات، بۆ ئەم مەبەستەش لیژنەیەکى باڵا لە نوێنەرى وەزارەتەکانى دارایى، کاروبارى کۆمەڵایەتى، بازرگانى و پیشەسازى کشتوکاڵ پێکهێندرا، چەندین بژاردەش پێکەشى لیژنەکە کران بۆ ئەجامدانى گۆڕانکارى لە بەشە خۆارکى مانگانەدا".

راشیگەیاند: "بە هۆى دابین نەکردنى بودجەى پێویست بۆ بەشەخۆراکى مانگانە، وەزارەتى بازرگانى نەیتوانى وەکو پێویست بەشە خۆراکى هاووڵاتیان بە تەواوى دابەش بکات، ئەمە جگە لەوەى ئەو خۆراکەشى کە دابەشکرا کوالێتی باش نەبوو و بەشێوەیەکى ناتەواو دابەش دەکرا".

ئاماژەى بە ئەوەش کرد: "یەکێک لەو بژاردانەى لیژنەکە کارى لەسەر دەکرد بڕینى بەشە خۆراکى مانگانەى ئەو هاووڵاتیانە بوو کە مووچەخۆرن و پلەى تایبەتیان هەیە، وەکو بەڕێوەبەرى گشتى و بریکارى وەزیر و فەرماندەکانى سوپا و مامۆستاى زانکۆ، لە بەرامبەردا ئەو بەشە خۆراکەى بە هاووڵاتیان دەدرێ کوالێتى باش بکرێ و مادەکانى سەبەرتەى خۆارکیش زیاد بکرێ".

روونیشى کردەوە" بڕیارە بۆ ئەمساڵ حکوومەتى عێراق یەکێک لەو بژاردانە پەسەند بکات و لە رێگەیەوە گۆڕانکارى لە بەشە خۆارکى مانگانەى هاووڵاتیاندا بکرێ، هەر گۆڕانکاریەکیش لە بەشە خۆراکى مانگانەدا بکرێ، هەرێمى کوردستانیش دەگرێتەوە"








باسنيوز