گەمەی ئەلكترۆنی بۆ حەسانەوەی ڕۆح و ئارامی بەخشین بەجەستە، بۆ هەر كەسێك و لەهەر تەمەنێكدا گرنگە.. هەرچەندە لەناوچەكەی ئێمە و وڵاتانی دەوربەر كۆمەڵگە وابیردەكاتەوە گەمەكردنی ئەلكترۆنی تەنیا بۆ تەمەنێكی دیاریكراوە.. ڕۆژانە چەندین گەمەی نوێ و پرۆگرامی تایبەت بەگەمە و ئامێری تایبەت بەگەمە بەرهەم دێن، نوێترین ئامێری گەیم دەسكێكی گەیمە كە تایبەتە بەپلەی ستەیشن 3 و Xbox 360.
ئامێرەكە گەلێك دوگمەی زیاتری لەهاوشێوەكانی خۆی هەیە بوونی ئەو دوگمانەش دەبنە هۆی ئەوەی كە یارمەتیدەرێكی باش بێت بۆ گەمەكەرە.
دەسكی گەمەكە كە بەAvenger Elite ناسراوە زیاتر بۆ گەمەی لەنێوان دوو یان چەند یاریزانێك دەبێت، هەروەها بۆ ئەوانەی كە تازەش فێری گەمە دەبن یارمەتیدەرێكی باشە.
ئامێرەكە لەچەند مادەیەك پێكهاتووە كە لەگەڵ سیستەمی تەندروستی مرۆڤ دەگونجێت و كاریگەری خراپی بۆ سەر پێست نییە، هەرچەندە ئامێرەكە بۆ كەسانی پسپۆر لەبواری گەمەدا بەرهەمهاتووە، بەڵام كەسانی تازەكاریش بەئاسانی دەتوانن سوودی لێوەربگرن.